Un asturianu lleva a xuiciu a Wanadoo

Un internauta asturianu, profesor de derechu del trabayu na Universidá, denunció a la compañía Wanadoo por incumplimientu de contratu nel serviciu de conexon a internet via ADSL qu'ufierta la filial española de France Telecom. El denunciante, que vive en Llugones, echó más d'un mes dándo-y parte al serviciu d'atención al cliente del servidor de que la velocidá de la conexón que tenía contratada baxaba enforma los díes de per srelmana de les 6 y media de la tarde en p'alantre, quedando baxo mínimos hasta les tres de la mañana, mientres que sábados y domingos el baxón de velocidá duraba entovía más. Según el denunciante, la velocidá contratada yera de 200-220 kbps, pero los "colgones" de Wanadoo dexaben dacuando la velocidá en 20 kbps.



Énte esta situación, Iván Antonio R.C. decidióse el 22 de setiembre a poné-y un pleitu a Wanadoo nel Xulgáu de Primer Instancia nº 3 de Siero. El xuez almitió la demanda a
trámite y la vista tien fecha pal 27 de payares. Esti ye'l primer casu de demanda por incumplimientu de contratu en servicios ADSL que se da n'Asturies y ye bien fácil que tamién seya'l primeru en tol estáu. El denunciante quexóse de la estorsión que faen los servidores d'ADSL, qu'obliguen a firmar contratu per un periodu mínimu d'un añu, amenazando con cobrar el alta, el módem y les cuotes que falten p'acabar l'añu en casu de que'l cliente quiera dase de baxa enantes de los 12 meses.

Wanadoo ye anguaño'l segundu proveedor d'accesu a internet n'Europa y tamién n'España. Con unos ingresos de 2.000 millones d'euros nel 2002, la compañía da trabayu a 7.000 persones en tol mundu, incluyendo toles filiales n'Europa, África y América.