Un 88 por cientu de los llectores d’Asturies.com, contrariu a la regasificadora d'El Musel

|

La regasificadora d’El Musel ha de valtase por “peligrosa” y “innecesaria” tres la sentencia del TSX de Madrid qu'anula la so autorización. Ésta ye la opinión del 88 por cientu de los usuarios d’Asturies.com que participaron nel ‘Conceyu Abiertu’.

A primeros de mes el tribunal madrilanu anulaba l’autorización de la regasificadora énte una denuncia de Los Verdes d’Asturies, güei integraos n’Equo, por tar a una distancia inferior a los 2.000 metros que marcaba la llei nel momentu d’aniciar el trámite de la llicencia. Esta sentencia dexa pa prau una inversión de 400 millones d’euros yá terminada pero nunca puesta en funcionamientu, anque la intención del Ministeriu d’Industria, Enerxía y Turismu ye recurrila.

Entrugaos por esta situación nel nuesu ‘Conceyu Abiertu’, los llectores d’Asturies.com amosaron la so disconfirmidá con esta instalación pola so peligrosidá y por considerala innecesaria. Asina, un 88 por cientu ta a favor de que se valte la regasificadora, por un 10 por cientu que ve necesario buscar una solución a esti asuntu. Mentes, un 2 por cientu voto pola opción ‘Nun sé’.

Dende esti momentu yá ta abiertu un ‘Conceyu Abiertu’ nuevu. Nesta ocasión queremos saber qué opinión tienen los nuesos usuarios sobre la cancelación de l’actuación d’Albert Pla nel Teatru Xovellanos prevista pa mañana por unes declaraciones feches pol artista a un diariu asturianu nes qu’aseguraba que-y daba “ascu ser español”. 

 

Contador Estadistiques