Últimos díes pa votar al meyor cantar n'asturianu

El próximu día 5 acaba'l plazu pa votar na primer fase del concursu d'Asturies.com, "Premia'l meyor cantar n'asturianu".

Hasta'l día cinco pue votáse dende esta páxina al meyor cantar n'asturianu y participar nel sortéu de dos llotes de regalos. N'acabando esta primer fase de votaciones, dempués del día cinco, va ponese n'Asturies.com un Conceyu Abiertu especial colos tres cantares que más votos recibieren , y el cantar que más votos lleve d'esos tres sedrá, a xuiciu de los y les llectores d'Asturies.com, el meyor cantar n'asturianu de 2003.

Tres de diez díes y cientos de votaciones tenemos yá unos claros favoritos. El tema "Fayeos de Mayo" de "Felpeyu" sigue recibiendo muncho apoyu y ye líder de la votación. Otru tantu pasa col cantar "Brañas d'Antaño" del grupu "Gatos del Fornu" que tien cásique amarráu'l segundu puestu nes votaciones. Sicasí, pa la tercer plaza nel tríu finalista hai una competencia mui duro ente "Tejedor" con "Andolina" y Anabel Santiago con "Al son de la lluna", pero la llucha nun acaba ehí, porque pa esti tercer puestu cuenten tamien otros dos temes de Felpeyu, que son el "Cantar del Home solu" y "La Pongueta". Ello demuestra la preferencia del públicu pol grupu d'Igor Medio, anque de quedar terceru ún de los sos cantares, los Felpeyu competiríen con ellos mesmos na final, cosa que podría favorecer al cantar de los Gatos del Fornu.

Remembramos que los cantares polos que se vote tienen que ser n'asturianu, ello ye, nun valen instrumentales, y tienen que ser obres orixinales espublizaes ente'l 1 d'avientu de 2002 y el 30 de payares de 2003. Nun puen dase por bonos los votos por cantares enxeryos en discos d'otros años (que tan llegando abondos) nin tampoco a temes instrumentales. En cuantes que'l concursu ye pa temes orixinales, tampoco nun se dan de pasu los votos al favor de versiones, casu del "Puente sobre agües" de los Berrones, que ye una versión de Simon y Garfunkel. Últimos díes pa votar y ganar premios con Asturies.com