Tresxénicos, el debate llega a Asturies

El debate sobre los productos tresxénicos vuelve estes selmanes al primer planu de l'actualidá depués de que se celebrare en Malasia esti fin de selmana la primer Conferencia Mundial sobre Bioseguridá, na que l'alcuerdu más importante foi la creación d'un sistema internacional d'etiquetáu que permita identificar cualquier organismu modificáu xenéticamente qu'entre en mercáu.

La regulación de los alimentos modificaos xenéticamente que lleguen al mercáu faise cada vegada más necesaria, en cuantes que l'espardimientu de les especies vexetales alteraes xenéticamente paez yá un procesu que nun tien torna. La revista mediuambiental Worldwatch espublizó va poco un reportaxe en que diz que'l 25 por cientu de los cultivos mundiales de colza, maíz, algodón y soya yá son tresxénicos. La carrera de los tresxénicos tien más tiempu de lo que se pueda pensar. La primer planta alterada xenéticamente ye del añu 1.983, entamando entós una industria que pon los sos productos en 67,7 millones d'hectárees y que ta en manes d'un garapiellu d'empreses que puen contase colos deos d'una mano. Asina, Monsanto controla'l 80 por cientu de los tresxénicos del mundu, Aventis el 7
Novartis y BASF col 5 por cientu caúna y DuPont col 3%


Estes empreses vienden la semiente en 'paquetes tecnolóxicos' nos que va tamién enxertu un herbicida que desanicia toles demás plantes menos la variedá tresxénica a la qu'acompañen. Ello ye que como Monsanto remana'l 80% del mercáu, la pareya más normal nel mundu de los tresxénicos ye la que faen una semiente de Monsanto col herbicida Roundup, una especialidá de la casa que tien el glifosatu por principiu activu. La semiente patentao por Monsanto ye resistente al glifosatu, un axente que seca toles demás plantes. En teoría, el glifosatu ye biodegradable y a los trés meses nun queda traza d'ello, pero hai estudios que dicen lo contrario y qu'aseguren que'l Roundup va caltriando na tierra y acumulándose hasta ser a envelenar l'agua en casu d'entrar en contactu con ello. Otres especialidaes de llaboratoriu lleven enxertu'l Bt ('bacillus
thuringiensis'), que fabrica una toxina insecticida, colo que nun ye preciso sulfatar la faza.
D'otra manera, la distinta resistencia a enfermedaes y parásitos y distintes pautes de reproducción de los tresxénicos suponen tamién un peligru en cuantes que puen prender fuera de les faces en que se planten industrialmente y colonizar grandes superficies, desaniciando otres especies non alteraes y tracamundiando equilibrios naturales.


Contra los tresxénicos, la revista Worldwatch alvierte de que nun se trata namás d'un problema mediuambiental. Según los fabricantes de tresxénicos, la mayor productividá d'estos pue ayudar a acabar cola fame nel mundu, pero según la revista, la intención de les multinacionales que los fabriquen nun pasa pel altruísmu. Ello ye que l'espardimientu de los tresxénicos lleva arreyada una posición de dominiu del mercáu poles multinacionales que los desarrollen, que podríen asina caciplar llibremente y poner los precios que quixeren. José Santamarta, director de Worldwatch, remembra que, anque'l repartu que se fai d'ello ye mui desigual, yá se producen anguaño cereales abondo pa dar de comer a tola población mundial ensin falta de tresxénicos, y remata esplicando que los tresxénicos van tener "consecuencies muncho más graves y que van durar más nel tiempu que los plaguicides tóxicos" y que son "el remate d'un modelu insostenible, qu'aprobez a los agricultores y daña a los consumidores".

A últimos del otru añu, el debate de los tresxénicos llegó de sópitu a Asturies cuando se conoció que nel país se punxeren les primeres seyes hectárees de maíz tresxénico. El sindicatu agrícola COAG-Asturies, que diz que trés meses depués de conocese la esistencia d'esa plantación, entovía nun saben exactamente au s'asitió l'esperimentu, foi'l primeru en marcase, y dafechu en contra, énte la llegada del maíz alterao. Pa COAG, la convivencia ente variedaes tresxéniques y normales ye imposible, y entiende que ta xenerándose un marcu llegal, a nivel européu y estatal, que prepara l'espardimientu de tresxénicos a gran escala. Esti marcu llegal ígüenlu'l proyectu de recomendaciones sobre'l tema de la UE y un borrador estatal d'Orde sobre normes de coesistencia de los cultivos modificaos, convencionales y ecolóxicos. Énte ello, COAG-Asturies reclamó güei nun comunicáu que s'abra un debate social nel que participen tolos sectores interesaos pa que la sociedá conoza les característiques y los efectos de los tresxénicos