Trenta años de contaminación na Ría de Navia

La Coordinadora Ecoloxista d'Asturies dio-y anuncia a la
Dirección de Calidá Ambiental y Obres Hidráuliques del Principáu
d'Asturies la so oposición a que se-y prorrogue a la papelera de Navia l'autorización de
vertíos que tien concedía dende 1974 y que caduca esti añu

La Coordinadora entiende que la papelera d'ENCE (antigua CEASA) nun cumple les disposiciones llegales en cuantes a
concentración de contaminantes nos vertíos d'agua.

Según l'alcuerdu del añu 74, la diputación asturiana daba-y el preste a CEASA pa verter a la mar pel
emisariu submarín de la marxe derecha de la ría per un periodu de trenta años que remata nesti 2.004. La Coordinadora entiende que, anque se ficieron munches obres de meyora y cambeos na papelera nestos trenta años, les

concentraciones de sustancies contaminantes, en cuenta de menguar, xubieron nestos años en dellos compuestos. Según los ecoloxistes, la propia empresa cuenta con que xuban dellos productos tósicos, duplicando la tasa de sólidos en suspensión. En concreto, lo que suelta l'emisariu triplicaría la
demanda química d'osíxeno que pon de tope la llei y perpasa tamién los topes de presencia d'aldehídos y nitratos, aumentando tamién la presencia d'aceites y
espumes.

Sobre la entrada en funcionamientu de la planta de coxeneración arreyada a la factoría, na que se quemen los restos que nun valen pa facer corriente elléctrica y calor, los ecoloxistes alvierten qu'esta planta va amestar al fedor que suelten los mercaptanos de
la freba de papel un mayor índiz d'insalubridá del aire na redolada de la ría, por culpa de la mayor presencia de dioxines.

Por culpa de too ello

la Coordinadora defende que, dempués de trenta
años de contaminación indiscriminao, el Principáu tendría d'obligar a la empresa a facer una meyora integral del modelu productivu pol
bien de los habitantes y de la mesma ría, sobremanera nun momentu en que la planta, acabante d'ampliar en producción, tamién va ser más rentable gracies a la planta de coxeneración eléctrica.