¿Trancar los caladeros?

Esa ye la entruga que tienen enriba la mesa pesquinos, cofradíes y autoridaes. Les declaraciones la otra selmana selmana del patrón de la Cofradía de Candás anunciando qu'elli nun diba salir a pescar porque nun respondía de la calidá del pescáu llevantaron la tema del pieslle de caladeros nel país. Ello ye que delles cofradíes tan por trancar, casu de les de LLastres, Candás, Tazones y Cuideiru pero otres, con Avilés y los mariscadores del occidente y anguleros a la cabeza, como les de Viavélez o Busto nun ven razón pa ello. Bien de pesquinos denunciaron que tan sacando redes y nases con pexe y mariscu muerto, y incluso que dellos restoranes refugaron percebe que golía a galipote, como diz en dellos foros pela rede.

La primer reacción del Principáu el día 10 foi la de responder pola calidá pola calidá de lo que se pescare, anunciando pa ello un programa cola axencia de Seguridá Alimentaria, pero tres díes depués el conseyeru de mediu rural decretaba una parada de los barcos con artes de cercu que trabayen de nueche y cerca la costa, una midida parcial qu'afectaba a 12 barcos y 140 pescadores dedicaos mayormente a la pesca d'especies como la sardina, el bocarte o la parrocha. Esti paru págase con 40 euros a cada marineru, de los que'l Principáu aportaba trenta y l'estáu los otros 10, más 21 euros por barcu y 4,70 por tonelada de rexistru pal armador.

Según diben pasando los díes, cada vegada yeren más les cofradíes que decidíen pasar al bandu de los que querín trancar, llegándose a una situación agora na que siete cofradíes de 19 piden que se pieslle la pesca dafechu, mientres que les demás muévense ente les 5 que nun ven torga denguna pa seguir pescando o les demás que nun quieren pronunciase. Ente les que quieren trancar tamién hai opiniones como la de los llastrinos, que ven que podíen facese paros parciales acordies a como vaya camudando la situación

El conseyeru de Mediu Rural, Santiago Menéndez de Luarca, que nun acaba de decidise por echar el piesllu, diz que trancar los caladeros asturianos costaría 2,5 millones d'euros al mes. Mientres, el patrón mayor d'Avilés dicía ayeri que'l pescáu que ta saliendo ye sano. Too depende del alcuentru que van tener güei les cofradíes col conseyeru, del que tendrá que salir daqué en claro.

En Conceyu Abiertu proponémosvos esti mes una encuesta sobre'l pieslle de los caladeros n'Asturies ¿hai que trancalos pol bien de la salú pública o non?