Tranca por amenaces el portal fartones.com

La web asturiana de crítica gastronómica independiente www.fartones.com, que dende esti diariu diéremos a conocer va dellos meses, ta acabante de trancar por culpa d'una amenaza de denuncia.

Fartones.com venía funcionando dende va tiempu como l'intentu d'un garapiellu d'amigos, entendíos nel arte del comer, de facer una guía gastronómica distinta na que, al nun mediar interés nengún nin haber falta nenguna de quedar a bien con naide, la crítica podía echar pel local en cuestión en casu de que los platos o el serviciu nun-yos prestaren al equipu de críticos anónimos "¿Los vinos?, imaginaivos: Marques de Griñón Alea y Albariño de la casa que debieron de comprar por palets en una tienda de 20 duros". Esta independencia yera sl'orgullu de la xente de Fartones.com, que presumía de nunca dase a conocer al visitar un local y de nun pidir nin aceptar pagu nengún por facer les crítiques, que, por supuesto, munches vegaes pintaben bien pal restaurante y convidaben a pasar per ellí "Vaya besugo, cagonmimanto, menudo besugo. Perfecto punto de horno, nada de aceitón, guarnición perfecta (patata cocida, zanahoria, brecol) y un sabor de pescao fresco que hacia tiempo que no recordaba".

L'humor del equipu de Fartones, que procuraba facer les cróniques lo más gracioses posible, tamién yera otra de les señes d'identidá del portal, y frases como "mira tu que ye dificil facer una bola en la boca con una bechamel, pues aqui el críticu esti que suscribe consiguiolo" o "nesti pueblu tienen la puta manía de recomendate platos fuera de carta sin avisate de los precios y claro pasa lo que te pasa, metente unes osties como calderos (como fué esti casu)" dicen abondo

El casu de Fartones.com talamente semeya'l d'una web que morrió por culpa del ésitu, y ye que tal parez que la esistencia del portal peligró dende'l mesmu momentu en que se dio a conocer a un públicu mayoritariu. Los responsables de Fartones dicen que, en viendo que los criticaben por faltar al respetu, iguaren les cróniques pa quita-yos frases que podíen tomase a mal, pero l'once d'agostu recibieren un corréu en que-yos alvertíen que diben pone-yos un pleitu y que diben producise "alcuentros" nes oficines onde trabayaben los responsables de la web, polo que decidieron dala de baxa.