Tragsa nun va llimpiar la tercer marea negra gallega

Según anunció esta mañana la Xunta de Galicia, el Gobiernu gallegu decidió retirá-y a la empresa pública estatal Tragsa la concesión que tenía pa retirar el galipote de la costa gallega y xestionar los equipos de voluntarios y barcos de llimpieza. Dende'l momentu en que Tragsa s'encargó d'esti llabor entamaron les quexes y protestes contra esta empresa, lo mesmo dende sectores d'espertos na cuestión que de la sociedá civil gallega. Un mes llargu depués, reconozse que Tragsa, tercer empresa pública que más réditos produz depués de Correos y Paradores, trabayó ensin coordinación nenguna y ensin métodu seriu, siendo más una estorbisa qu'una ayuda. Dende mañana, sedrá directamente la Xunta quien lleve la coordinación de la tercer marea negra, que yá llegó a 500 playes gallegues y que l'aire y les corrientes podríen traer fácilmente pa contra Asturies.

Dellos espertos en temes de la mar denunciaron que la empresa metía maquinaria pesao nes playes y pedreros p'acabar primero'l trabayu, una solución abondo dañible pal mediu que se suponía que teníen de recuperar, mientres que dende cofradíes de pescadores negáronse a trabayar con Tragsa pente'l mediu, yá que la empresa pagaba a unos barcos por salir a llimpiar y a otros non, lo que-yos abultaba una discriminación interesada que venía a francer una sociedá civil que, hasta esi momentu trabayaba en comuña y ensin esperar más remuneración que la de les ayudes oficiales por dexar de pescar. La protesta contra Tragsa fízose tan grande qu'hasta cámares de comerciu como la d'Arousa pidieron que Tragsa abandonare'l llabor, neto qu'organizaciones ecoloxistes como Adega. Los voluntarios tamién dicen qu'a delles playes nun dexaben entrar namás qu'a personal de Tragsa, como diz nestos foros del sindicatu CCOO na Universidá de Vigo.

N'Asturies, Tragsa, como empresa pública que ye, tamién ta encargada de contratar brigades de llimpieza, moviendo tolos díes un equipu de más de 150 persones. Mientres, nel teléfonu 112, que coordina tolos llabores rellacionaos cola marea negra dan avisu de que nun se necesiten más voluntarios de momentu y tomen los datos de quien-yos llame cola promesa d'avisar más en p'alantre, cuando puedan da-y un destín a la persona interesada