Tolos autores asturianos nuna base de datos

Va dos años, l'investigador asturianu Xosé Nel Comba gano'l premiu d'Investigación Bibliográfica Padre Patac con un trabayu que consistía nun xigantescu estoyu en qu'aparecíen tolos escritores en llingua asturiana de la historia xunta'l rexistru de les sos obres. Esti emponderable trabayu, qu'atropaba a 400 autores, foi la base pa que depués s'amestaren a la base de datos los escritores asturianos en llingua castellana, un trabayu en que collaboraron los profesores Xuan Carlos Busto, Xulio Viejo y Leopoldo Sánchez Torre y que llevó'l cuerpu de la base de datos a un total de 2.500 autores y más de 15.500 entraes bibliográfiques, que se reparten en 8.500 obres espublizaes, más de mil manuscritos y 6.000 referencies ente dambes llingües. El resultáu final ta acabante de volcase na internet dientro del portal del Principáu d'Asturies, onde pue entrugase por cualquier obra y autor que nos pete.

A efectos d'esta base de datos hai que dicir que los autores n'asturianu tan meyor representaos que los otros, en cuantes que de los escritores en castellanu namás salen los que morrieron enantes de 1.940. Otramiente, la base de datos da pa comparances, y ye que la proporción d'autores qu'a lo llargo de la historia qu'emplegaron lla llingua minorizada ye nada menos que del 15% que nun ye poco.