Tocando pelos Pueblos, música tradicional dende Ayer

Esti fin de selmana ye'l más llargu pa los ayeranos, dende'l
vienres cola amuesa de música tradicional "Tocando pelos
Pueblos", hasta'l martes cola celebración del Samartín.



"Tocando Pelos Pueblos" ye una iniciativa de los
"Humanitarios de
Samartín" que consiste nun conciertu onde músicos
tradicionales d'Asturies y de fuera enllenen una tarde de música. Los
Humanitarios de Samartín son una hermandá histórica de
Morea d'Ayer que lleva dende primeros de sieglu ayudando a la xente
probe del conceyu, y defendiendo la cultura tradicional asturiana. Esti
compromisu cola cultura tradicional espéyase n'iniciatives como esta de
"Tocando Pelos Pueblos", qu'esti añu va traer a Eric Quemere
y Pascal Guingo, dos músicos que vienen de Bretaña y que nun ye la primer vez que tan
n'Asturies. Podemos dicir que son vieyos conocíos nel ambiente "folki"
asturianu, anque siempres viéndolos per separao. Magar de la esperiencia que tienen como músicos tradicionales y como
amigos que son, esta va ser la primer vez que toquen xuntos.

Tamién va
tar "Pandeiromus",
sestetu gallegu que ñaz va agora 12 años col enfotu de recrear
un repertoriu de música tradicional gallega dafechamente cantada
por homes: cantares de ronda, de cortexu, de chigre, de trabayu... ensin dexar
de llau les tradicionales xotes, muñeires, maneos, etc. Anguaño, Pandeiromus
amiesten temes nuevos al repertoriu tradicional, con acompañamientu del
curdión col envís d'axuntar otros temes más serondos na
música tradicional del País vecín; ensin escaecese de
delles pieces de composición propio. La representación asturiana
va venir de la mano d'Anabel Santiago, la conocida cantante de tonada que dio'l
saltu col so
"Al
son de la lluna". El conciertu va ser el próximu 7 de payares
nel Teatru "Cine Carmen" de Morea, dende les 8 y media la tarde.



El martes llega un gran día pa l a xente de Morea que celebren al
so patrón. Nesta fiesta la música asturiana tien abondo que
dicir. Dende les 10 de la mañana p'arriba va haber pasucais con grupos de baille
tradicional, bandes de gaites, bandines tradicionales, y parexes de gaita y
tambor. Van participar ente otros Aires de Valdés, Villa
d'Avilés, Banda Gaites de Corvera, Xiranda, Esbardu, La Hedra, Bandina
La Curuxa, Bandina La Fontina, Folklore Allerán, L'Artusu y Ruxidera.
Depués misa cantada, puya'l ramu, desfiles y una poderosa xinta en toles
cases del pueblu con fabes y pachón pel medio. A les 6 de la tarde una
prestosa iniciativa como ye "Tarde en danza" na que podemos averanos
al baille tradicional asturianu de forma prestosa y cenciella. Pa zarrar a les
20:00 va tar l'actuación de "La Bandina " y echaráse la
tradicional danza.