Tintín fai 75años

El 10 de xineru de 1929, el suplementu pa rapacinos del periódicu belga "Sieglu XX" espublizaba'l primer volume de les aventures de Tintin. "Tintin nel país dels Soviets" que daba una visión enforma negativa sobre la vida nel país comunista foi el primeru d'una riestra de ventitres àlbumes, toos cola firma d'Hergé, alcuñu del dibuxante Georges Rèmi, que morrió en 1980. Con más 200 millones d'exemplares de les sos aventures y xenerando unos beneficios de más de 15 d'euros, Tintín ye ún de los iconos del cómic européu del sieglu XX xunta Asterix, anque les llectures que se faen de dambos personaxes son bien distintes.

Contra la visión d'Asterix como un lluchador contra la bota del imperiu romanu, Tintín identificose siempres como un personaxe con un ideariu de dereches y un defensor del colonialismu, calter que se marca dafechu n'aventura africana "Tintín nel Congu", onde'l personaxe llega a enseña-yos a los nativos del Zaire que la so nación ye Belxica. Les reediciones de les aventures de Tintín de dempués de la Segunda Guerra Mundial retocaron esta y otres frases p'aselar el conteníu ideolóxicu del primer Tintín, como s'analiza nesti artículu.

Ello ye que 75 años dempués Tintín sigue d'actualidá. La casa de la moneda belga ta acabante de sacar una pieza de 10 euros conmemorativa del aniversariu d'esti personaxe que vende tebeos ensin tasa y que se cuenta con que salte a la pantalla grande nuna película que va dirixir Steven Spielberg.

Anque de mano Tintín nació como un productu pa consumu nacional en Bélxica, el so valir artísticu innegable llevó a que les aventures de Tintín se traduxeren a más de 50 idiomes, ente ellos l'asturianu. En 1994, la editorial Aína espublizó na llingua del país dos de los títulos más conocíos de Tintín, La Islla Prieta y Stock de Cok. El primeru yá ta escosáu, y del segundu namás queden dellos exemplares, que son oxetu d'interés pa coleccionistes