Tenerife 0 - Sporting 1

El Sporting entamó l'añu con un trunfu en Tenerife que-y val pa mangase otra vegada en plaza d'ascensu. Los de Marcelino, que llegaron a Tenerife atacaos de baxes, ficieron un partíu probe al ataque pero efectivu. El Tenerife apertó enforma a lo llargo de tol partíu, pero la lesión de Martín Posse de la qu'acababa'l primer tiempu afogó al equipu canariu, que recuperó un poco cuando concasó nel xuegu les entraes de Keko y Willy. El Tenerife salió fuerte na segunda parte, pero nel minutu 78, cuando la cosa taba más indecisa, Pablo Álvarez marcó'l gol del trunfu a pase de Juan. Yera cásique la primer vegada que los asturianos víen portería nun partíu en qu'anduvieron febles n'ataque y nel qu'acusaron la falta del rematador Mate Bilic y d'otros xugadores que faen la diferiencia en centru'l campu, pero polo menos hubo efectividá. Anque'l Sporting tuvo ocasiones pa remachar el marcador, los locales guapamente pudieron empatar, con Keko estampando un trallazu nel poste asturianu y Vázquez fallando por pocos centímetros. Acabáu el partíu de les canaries, el duelu nel cume ente Cádiz y levante resolviose col trunfu de los valencianos, qu'agora son líderes y qu'echaron a los andaluces al cuartu puestu.