Telecable, ente los más baratos

L'operador de telecomunicaciones asturianu Telecable ye una de les compañíes qu'ofrecen llamaes metropolitanes más barates, según un estudiu de l´asociación de consumidores FACUA. Según esti estudiu, hai muncha publicidá engañosa nesti sector con ufiertes que llueu nun son tan competitives como anunciaben. L´Asociación de consumidores que fizo´l estudiu diz que parte de la culpa de los altos precios nes llamaes ye´l del Gobiernu que caltién una política que favorez a Telefónica al caltener la prohibición de baxar precios, sobremanera nes llamaes metropolitanes. Ye nidio qu´esta política van escontra los intereses de los consumidores que gasten perres a esgaya nes sos llamaes llocales, les más cares xunta les llamaes de fixu a móvil.



L'estudiu da anuncia de que les operadores más económiques del estáu son Aló, xunta a Tele2, Euskatel, R(4), Retena, Reterioja y Telecable. De fechu, la empresa asturiana de telecomunicaciones ye una de les más competitives yá que les llamaes metropolitanes en horariu de tarifa reducía salen a 0,0917 euros mentantu que si ye n'horariu normal el preciu ye de 0,1271 euros. A la contra, les compañíes más cares son Telefónica, Auna, Spantel y Ono. Pero quiciás lo que más llama l'atención ye´l casu de les operadores que dan precios perbaxos pero que depués nun son al final tan competitives por culpa de la franquicia de llamada, tasa que cobren por l'establecimientu de llamada.

Anque la empresa asturiana nun sal mal parada nel estudiu de FACUA, lo cierto ye qu'entovía tien muncho que meyorar, sobremanera na estaya d'atención al cliente, y nun hai qu'escaecer la riestra de fallos técnicos del serviciu, especialmente nel accesu a internet, polo que la calidá del serviciu tá bien lloñe de les esixencies del mercáu. Y ye que la filial d'Hidrocantábrico, con una perimportante presencia en Xixón, Avilés y Uviéu, lleva años metida nun procesu d´espardimientu de la rede de cable país que va muncho más despacio de lo que debiere y qu'esti añu tendr{ia de concretase cola llegada adel cable a les Cuenques Mineres.