Telecable anuncia meyora

La empresa asturiana de telecomunicaciones dio anuncia esti vienres de que yá tan rematando los trabayos qu'entamare'l mes d'ochobre del añu pasáu de meyora de la rede básica de freba óptico cola qu'apurre serviciu de conexón de banda ancha a internet. Anque'l llabor inda nun terminó, dende la compañía aseguren que los sos veceros tienen de notar yá una xuba na velocidá de les conexones, que hasta la selmana pasada nos intres de más tráficu llegaben cásique a estragase dafechu.

De la qu'entamó a dar serviciu, Telecable yera una alternativa que perpasaba con bastante a les conexones tradicionales via modem y que por preciu y velocidá yera competencia directa pa col ADSL. Sicasí, la compañía asturiana pue dicise que morrió a resultes del trunfu. Con más de 50.000 llinies funcionando a primeros d'esti añu (una xuba del 150% sobre l'añu 2001), Telecable tenía la rede n'obres y más conexones de les que podía aguantar, colo que les prestaciones menguaron escandalósamente, y bien de clientes llegaron a dase de baxa na operadora. Los más críticos pa cola compañía dicen que nun-yos convence la meyora que tan acabante de facer, porque tienen mieu de que l'espoxigue de la compañía en númberu d'abonaos vaya siempre per delantre de la infraestructura tecnolóxica pa apurri-yos serviciu y que fenómenos como esti vuelvan a repetise.

Otramiente, el negociu del cable parez que pue entrar nuna fase bien distinta, según pue sacase de les declaraciones del ministru Josep Piqué, qu'anunció la selmana pasada que'l gobiernu ta mirando de lliberalizar el negociu del cable y da-yos entrada a nueves empreses de servicios que compitan coles titulares de la rede. La situación actual vien de va seyes años, cuando'l gobiernu fizo un concursu pa instalar la rede de cable pol que cada provincia quedaba en manes d'un operador encargáu de tirar el cable y con llicencia esclusiva pa esplotalu. Nel casu d'Asturies la concesión foi pa Telecable, filial d'Hidroeléctrica que se creo a costafecha pa esta empresa. Depués de tou esti tiempu, namás les tres grandes ciudaes d'Asturies tienen la rede de cable terminada, y siguen ensin acabar les obres del cable nes cuenques mineres y Siero, siguientes obxetivos de la compañía.