Tarañu y Skanda, destacaos nes votaciones

El concursu qu'entama Asturies.com, y que busca'l meyor cantar n'asturianu del 2004 acordies coles preferencies de los sos llectores yá tien favoritos. Polo que se conoz hasta agora, ente los cientos de votos recibíos, rescamplen los cantares "Sangre d'ochobre" de "Skanda" y "Nun nos dexen" de Tarañu, dos temes d'inspiración diferente, marcada pol folk-rock nel casu de "Skanda" y por un folk más acústico nel casu de "Tarañu". Pero'l casu ye qu'estos dos títulos lléven-yos poca diferiencia a otros cantares que tamién tán recibiendo apoyos abondos. El cantar "Campu de batalla" de los lluanquinos "Skama la rede", tema espublizáu nuna maqueta de la banda'l pasáu añu, ta mui presente nos correos de los nuesos llectores, como tamién tán "Lin" de "Deua Dubra" o "Presente indicativu del verbu nun trabayar" del grupu "La Tarrancha". Los cantautores tamién reciben el preste del públicu, y asina Toli Morilla y Pedru Pereira tamién tán "peleando" por entrar nel tríu final, anque los sos seguidores tan repartiendo muncho'l votu ente distintos cantares d'estos dos artistes en cuenta de centrase nun solu tema, circunstancia que torga que tean más arriba nes votaciones.

Recordámos-yos a los nuesos llectores qu'esti procesu de votación va durar hasta'l llunes día 10 a les 12:00 hores. Dempués va facese'l recuentu de votos pa sacar los trés cantares que más votos recibieren pa entamar un "Conceyu Abiertu" con esos trés temes. Nesti "Conceyu Abiertu" decidirase finalmente cual ye'l meyor cantar n'asturianu 2004 según los llectores d'Asturies.com. Recordar tamién que con solo votar yá s'entra nel sortéu de trés llotes de regalos gracies a la collaboración de los nuestros patrocinadores, les cases de discos "L'Aguañaz" y "Fonoastur".