Ta pa salir el discu nuevu de Mus

El mes qu'entra va salir al mercáu "Divina Lluz", el nuevu trabayu discográficu del dúu musical formáu por Fran Gayo y Mónica Vacas.

El próximo 29 marzu ye la fecha oficial de presentación del rayu de "Divina Lluz" que nos manden "Mus". Dende que en febreru de 2002 presentaren el so anterior discu "El Naval" que namás se pudo ver equí en directo nun pequeñu y esitosu conciertu na sala Caxastur d'Uviéu, nun teníemos noticies discográfiques d'esta banda, que tuvo mui ocupada presentando "El Naval" per tol mundu. Agora estos xixoneses vuelven a afitar la so propuesta musical con 10 nuevos cantares que desenvuelven el discursu artísticu de "Mus" un grupu de pop electrónicu que nunca nun foi preofeta na so tierra pero que da conciertosalredor de tol globu. Sicasí, pa grabar y componer Mus vuelven siempre a Asturies, onde tamién contaron cola xente de casa a la hora de facer el discu. Asina Mus tuvieron acompañaos nel estudiu polos músicos de la banda que tocó con ellos na so xira pela Costa Oeste americana, Pedro Vigil, Manu Molina y Iker González, lo qu'asegura comprenetación y entendimientu nesti nuevu discu. Fuera de lo que son músicos profesionales, podemos adelantar que nesti discu collabora'l pensador asturianu José Luis García Rúa, históricu lluchador antifranquista, llibertariu y caderalgu de filosofía con una importante obra poética a les sos espaldes.

La presentación d'esti discu va trespasar unes cuantes fronteres, yá que "Mus" son una referencia estatal y mundial d'esta música. Nel estáu español el discu va espublízalu "Acuarela", nos Estaos Uníos "Darla Records" y en Taiwan "Avant Garden Recordings". Precisamente nel país asiáticu, onde tuvieron un gran ésitu de públicu y crítica col discu anterior "El Naval", los asturianos van dir a facer una xira con dellos conciertos que van rematar a lo grande con dos actuaciones na sala "The Wall", la más importante de Taipei.

N'Asturies vamos poder ver a "Mus" el 6 de mayu nel Centru Cultural Caxastur d'Uviéu, pero enantes Asturies.com va dar estrena a esti discu ufiertando-yos, en primicia, la posibilidá a los nuesos llectores de descargar ún de los cantares de "Divina Lluz" . Nes próximes selmanes informaremos de como y onde poder baxar esti adelantu del nuevu discu de "Mus".