Suspéndese’l conciertu ‘Asturies nun escaez’ previstu pal sábadu

Darréu comunicó na madrugada d’esti vienres que’l conciertu ‘Asturies nun escaez’ suspéndese “por mor del traficu d'influencies, presiones y acosos caciquiles” fechos dende’l Conceyu de Llangréu. El DMR mantién el restu d'actividaes.
 
“L'anulación d'esti eventu lúdico-políticu qu'a lo llargo de los años venía consolidándose como una referencia nel movimientu independentista asturianu representa una nueva agresión intolerable non yá al nacionalismu asturianu sinón al conxuntu de la mocedá activa y de les fuercies de la izquierda tresformadora, porque si bien ésti ye un casu sangrante necesariamente hai qu'entendelo dientro de la política global del PSOE de marxinar, criminalizar y afogar cualisquier iniciativa xuvenil que pretenda recuperar y actualizar los valores de llucha, solidaridá y llibertá de la revolución obrera del 1934”, señalen dende Darréu, organización que va esplicar los motivos que llevaron a suspender el conciertu de mañana en contra de la so voluntá esta tarde na inauguración del Día de la Mocedá Revolucionario. L’actividá musical del DMR, que vivía la so décima edición, tenía prevista l’actuación en Sama d’Escuela de Odio, Skama la Rede, Skontra, Taranus, IRA y Adizión Etílika. Toles persones que mercaron entrada, pueden canxeales nos establecimientos ú les mercaron.
 
Pese a esti contratiempu, el DMR va mantener el restu de los actos, que principien esta tarde cola mentada rueda de prensa, prevista pa les 18.30 hores na Casa de los Alberti, en Ciañu, a la que va siguir una proyeición d’un documental autoxestionáu, una charra alderique ‘Reflexones sobre'l movimientu obreru asturianu d'ayeri y güei' a cargu del sindicalista Cándido Carneru, y un alcuentru internacionalista.
 
Mentes, mañana, a les 12 hores, los xuegos tradicionales pasen a celebrase nel Parque Vieyu de La Felguera y yá de tarde, a les 18 hores, va tener llugar un homenaxe a los revolucionarios d'ochobre nel monolitu-homenaxe a Belarmino Tomás, a la que va siguir una marcha hasta la Casa Conceyu de Llangréu.