Suatea denuncia que'l ministeriu marxina a los interinos

El sindicatu d'enseñanza SUATEA denunció esta mañana en comunicáu de prensa que'l Ministeriu d'Educación trancó ayeri en falso la negociación en que tenía d'apautase'l procesu d'accesu a la función pública por parte de los profesores interinos. SUATEA pidía na negociación que s'apautare una forma nueva d'accesu a la función docente que-yos diere más estabilidá a los interinos, un colectivu que representa'l 25% del colectivu docente n'Asturies y que separtare'l sistema d'accesu d'interinos y d'opositores ensin esperiencia docente, en cuenta de forzar a dambos colectivos una competición ente ellos que namás xeneraba inestabilidá llaboral y rocea. Suatea argumentaba que más del 70% de les persones que pasen una oposición nun tienen esperiencia docente, mientres que muncha xente que lleva años trabayando en centros educativos quedaben ensin trabayu depués, en dellos casos, de munchos años d'esperiencia, y proponía un sistema asemeyáu al del accesu a la profesión sanitaria. Según informa la fonte sindical, un informe del Defensor del pueblu espeya la irregularidá d'esti sistema, qu'afecta a 80.000 docentes en tol estáu.

La organización sindical, tercer fuerza na educación asturiana, ta enforma malcontenta pola manera de llevar la negociación por parte del Ministeriu, que namás fizo una negociación "aparente" y qu'en realidá nun fizo otro qu'atechase en tecnicismos pa nun entrar al fondu de les cuestiones a tratar. El resultáu final de la negociación en que tenía de remocicase dafechu'l sistema d'oposiciones perpetúa, según el sindicatu, toles inxusticies del sistema actual y amás inclúi la resurrección del nomáu cuerpu de caderalgos, institución que lleva "l'alcuñu reaccionariu de la LOCE"