Suatea denuncia la situación de la escolarización del asturianu

El sindicatu d'enseñanza SUATEA ta cansu de "güelpes de timón" na enseñanza del asturianu y denuncia que la Conseyería d'Educación incumple la llei sobre esti particular en tolos niveles del sistema educativu. Pa entamar, en primaria nun taría cumpliéndose l'alcuerdu de plantiya del 7 de setiembre del 2000, que mandaba la presencia d'un docente d'asturianu a tiempu completu en tolos centros, siendo les itinerancies ente centros una midida escepcional. Según SUATEA, estes itinerancies son lo normal na dinámica diaria de l'alministración. De la mesma manera, en muinchos centros l'asignatura conséñase como "alternativa cultura asturiana" lo que en dellos casos aprovéchase p'adelantar materia.


SUATEA diz que, en llegando a la secundaria y bachiller l'asignatura apaez como optativa en cuenta de voluntaria, lo qu'incumpliría la llei d'usu, qu'especifica que l'asignatura tien de ser voluntaria ensin competencia con otres. Amás d'esto, como yá denunciaren otres organizaciones como la Xunta Pola Defensa de la Llingua Asturiana y hasta los mesmos estudiantes, munchos centros nun ponen l'asturianu nel cartafueyu de matriculación. SUATEA recuerda tamién la gravedá de la situación n'educación d'adultos, onde l'asignatura cenciellamente nun esiste.

No tocante a la situación del profesoráu, la organización sindical diz que la inestabilidá ye altísima, y sorraya'l fechu de que, al cambiar los alumnos de profesor a cada cursu, ello supón-yos una grave inestabilidá a les dos partes. Les declaraciones del titular de la Conseyería d'educación sobre l'asuntu, declarando que l'asturianu dase por localidaes y non por centros recibe la condena del sindicatu, que nun entiende por qué entós otres asignatures como la relixón se ponen en tolos centros y que s'entruga si ye que va haber centros pa estudiar inglés o matemátiques. Suatea ve que la oficialidá del asturianu ye la única igua posible, pero ve preciso adoptar midíes urxentes, ente les que destaca'l poner l'asturianu como materia curricular básica coles mesmes hores que'l castellanu y garantizar la so enseñanza en tolos niveles, amás de la creación de planes de formación permanente en llingua asturiana pal profesoráu.


Sobre la cuestión de los centros nos que nun se punxo profesor d'asturianu incluso teniéndolo solicitao alumnos abondos pa facer grupu, Berto Megido, ún de los responsables de la estaya de llingua de la organización sindical, declaró a Asturies.com que "anque hai dellos casos puntuales que van solucionándose, casu del Institutu de Ciañu o del Ximena, lo cierto ye que la sensación que se tresmite dende la Conseyería d'educación y, en concreto, dende Inspección, ye de que nadie quier facese cargu del ema y que namás quieren pasase la pelota ente ellos"
. Berto esplicó que la protesta nun va quedar nos medios de comunicación y adelantó una posible unidá d'acción ente les trés grandes organizaciones sindicales d'enseñanza (FETE - UXT, CCOO y la mesma SUATEA) sobre esti particular repitiendo la que yá se dio va dos años sobre esti mesmu asuntu