Stray Cats van tocar en Xixón

L'actuación de la mítica banda de rock ta prevista pal mes de xunetu.

La banda americana namás que va facer otru conciertu nel estáu español, el día 22 en Barcelona pa depués tirar pa Xixón y tocar na plaza toros el día 24. Esti conciertu ye l'actuación estrella de la segunda edición del Crossroad Festival de Xixón qu'aconceyó a munchos siguidores del Rock'n'Roll l'añu pasáu. Inda nun tan a la venta les entraes, la organización del festival quier más esperar a pesllar toles actuaciones p'anunciar el cartel completu y el preciu les entraes.

Los Stray Cats nacieron nos Estaos Uníos a primeros de los 80 nun momentu nel que yera la música de baille y los teclaos los que dominaben. Pero'l guitarreru Brian Setzer, el contrabaxu de Lee Rocker y el batería Slim Jim Phantom tiraron pela llinia clásica del rock, estilu col qu'algamaron l'ésitu. Depués de varios discos la banda desfízose va doce años y nun volvieron a tocar xuntos hasta l'añu pasáu nun conciertu en California. Coles bones sensaciones garraes nesi conciertu los Stray Cats decidieron volver a los escenarios y entamar una xira per Europa que ye la que los trai a Xixón.