Sporting y Uviéu arranquen la pretemporada cola vista puesta en lluchar pol ascensu a Primera

|
Sporting y Uviéu arranquen la pretemporada cola vista puesta en lluchar pol ascensu a Primera

L’actividá na Escuela de Fútbol de Mareo comenzó esti llunes coles pruebes médiques a los xugadores del Sporting, que’l miércoles van principiar colos entrenamientos. Mientres, El Requexón va acoyer el martes les primeres carreres de los xugadores del Uviéu.

El porteru Diego Mariño foi’l primeru n’esaminase baxo l’atenta mirada de Gonzalo Revuelta, médicu del club. Canella, Carmona, Barba, Sergio Álvarez, Juan Rodríguez, Isma López, Pablo Pérez, Hernán Santana y Álex Pérez foron los siguientes, mentes que los restantes van facelo mañana.

A los xugadores tamién se-yos fixo un estudiu baropodométricu y dende’l club destacaron que toos llegaron en perfeutes condiciones pa comenzar el miércoles, en doble sesión n’horariu por confirmar, colos trabayos a les órdenes de Rubén ‘Pipo’ Baraja nel so segundu asaltu p'ascender a Primera División. De momento, la única novedá ye, amás de los futbolistes qu’ascienden del filial, el mediu portugués André Sousa, ex internacional sub-21 que llega a Xixón cedíu pol Os Belenenses.

Cuatro fichaxes n’Uviéu

El balón va principiar a rodar mañana n’El Requexón, con una doble sesión d’entrenamientu a les 10 y les 18.30 hores, tamién col oxetivu d'asaltar la Primera División. Más cares nueves van vese n’Uviéu, con cuatro fichaxes roblaos hasta la fecha pa reforciar el plantel de Juan Antonio Anquela.

El primer fichaxe foi’l centrocampista Sergio Tejera, procedente del Nàstic, mentes que darréu llegó l’apuesta del ghanés Richard Boateng, mediu ofensivu procedente de Segunda División B. De Primera baxen pa xugar nel conxuntu azul l’ex porteru del Leganés –cedíu pol arxentín Club Olimpo– Nereo Champagne y el llateral derechu Carlos Martínez, un clásicu de la Real Sociedad.

L’Uviéu va disputar el so primer partíu amistosu’l día 18 frente al so filial, qu’esta temporada va competir en Segunda División B. Pela so parte, el Sporting va debutar  esi mesmu día en Les Caleyes contra’l Lealtad del ex roxiblancu Samuel.

Contador Estadistiques