Sporting 3 - Levante 2

Villa salvó al Sporting nun partíu emocionante y en que los de Maceda dieron otru pasu cara a aguantar la categoría pal añu qu'entra en medio de la crisis financiera del equipu.

La responsabilidá pesába-yos ayeri a los dos equipos que salíen al campu d'El Molinón. Si el Levante ta puyando por plaza d'ascensu, los asturianos teníen la obligación de da-yos una alería a la xente de casa y separtase de la parte baxa de la tabla. Por suerte pa los de Xixón, los primeros en marcar foron ellos, y eso descargolos de nervios pa tola primer parte. Villa y Lozano fabricaron en venti minutos el primer gol asturianu, col que se llegó al descansu, y tol primer tiempu foi un machaque del Sporting sobre'l Levante, perdonándo-yos l'árbitrio a los visitantes un penalti de llibru sobre Pulido. Pero pa la segunda parte la cosa camudó dafechu cola entrada de Congo. El delanteru colombianu del Levante desarmó la trasera del Sporting, que anque ganaba por 2-0 col gol de Pablo nun pudo atayar les llegaes del enemigu, qu'empató'l partíu. El xuegu taba rotu y la guerra de nervios volvía a los dos equipos, anque más al Sporting, que dexare pasar un trunfu que tenía amarráu, pero entós apaeció Villa pa iguar la situación, marcando'l definitivu en saque de falta.