Sporting 1 - Uviéu 0

Un gol de Lozano al poco d'entamar la primer parte dió-y el trunfu al Sporting nel derbi de la crisis. Col Sporting puxando por salir del fondu la tabla y l'Uviéu en puestu de colista, el partíu ente los dos etenros enemigos presentábase como un esame de setiembre más propiu d'equipos de tercer fila que de los dos mayores esponentes del fútbol del país. El fechu de que se xugare a les 12 de la mañana vieno tamién a quitá-y rellume al gran acontecimientu del fútbol asturianu, al qu'asistieron 18.000 persones, bien poco en comparanza colos antiguos derbis de primera. Anque hai que dicir que'l derbi namás foi asturianu nun 50%, y ye que, ente xixoneses y carbayones, namás saltaron al campu del Molinón 11 xugadores asturianos, siete cola camiseta azul y cuatro cola de rayes encarnaes. Con too y con ello, les dos personalidaes más rescamplantes del enfrentamientu yeren de la tierra: Oli y Villa, delanteros y líderes de dambos equipos, polarizaben l'interés de les aficiones, y anque'l duelu de puntes prometía, la cosa quedó un poco desllucía, esclariándose'l combate a los puntos, nos que'l guaje de Tuilla ganó al veteranu delanteru carbayón.

Yá de mano viose que la defensa carbayona, fecha por xugadores nuevos y qu'entovía nun tan bien acoplaos, diba ser un coladeru pa los de Maceda, qu'entamaron el partíu apretando en condiciones sobre la meta carbayona. Un tiru al poste de Juan al sacar una falta foi la primer alvertencia de los de casa, que s'enfotaben na conexón Villa-Lozano pa marcar, como foi a los pocos minutos. Sicasí, hebo cambéu de papeles, y la gloria del gol llevola Lozano, que foi quien marcó a pase del guaje. Parecía que los de la camiseta de rayes diben da-yos a los carbayones la pinfla más gorda de la historia, pero los azules apañáronse p'aguantar ensin llevar más goles en medio d'un bastiazu d'ataques sportinguistes que duró hasta la segunda parte. L'árbitrio tamién collaboró al nun decatase del penalti de llibru de Gurruchaga sobre Villa, mui trabayador en tou momentu

Pal segundu tiempu, la delantera del Xixón, frayada yá d'echar carreres, foi dexando-yos más metros a los de la capital, qu'acabaron de garrar confianza cuando l'árbitrio mandó pa la caseta a Cobas, que se dexó echar de la manera más boba. El Sporting tenía qu'aguantar con diez un resultáu curtiu pa los méritos que ficiere y, pa enriba, Maceda tenía que meter a Rubén por Villa, ensin fuelgu depués d'un partíu a tou meter. Mientres el Sporting seguía llanzando ataques, anque más de pascua en ramos, L'Uviéu averose un par de veces a la portería del Sporting, lo xusto pa que la emoción llegare al másimo cuando Oli raspió l'empate nel últimu minutu.