Sporting 0 - Uviéu 0

El derby Sporting-Uvieu yá llevaba xugándose tola selmana. Los cruces de declaraciones dende un equipu y l'otru, y la idega, más sicolóxica qu'otra cosa, de que d'equí saldría l'aspirante asturianu al ascensu, prepararon un partíu caliente. Nin personaxes como Gustavo Bueno pudieron callar la boca, y asina'l profesor de filosofía pidía que'l Sporting se dexare ganar a mayor gloria d'Asturies. El mesmu día del partíu, la estaya más faltosa de l'afición sportinguista recibió al tren que traía a los carbayones cortándo-yos la vía con una barricada de cubiertes quemando a l'altura de Serín. Les apretures económiques de los dos equipos tamién foron actualidá nuna selmana en que'l Gobiernu asturianu echó-yos un cable de 200 millones de pesetes a los dos equipos.Tres toos estos acontecimientos, más de 25.000 persones ficieron la mayor entrada nel estadiu del Molinón dende 1995, anque dempués el partíu nun respondió a lo que s'esperaba, remembrando a los últimos derbys que s'echaron en primera más qu'a los dos espectaculares d'esti añu. Ello ye que nin el Sporting nin l'Uviéu, conservadores por demás, dieron un espectáculu a l'altor de les circunstancies, anque con lo que nun contaba naide yera con que l'árbitriu se conviertiere nel protagonista del partíu. El partíu entamó mui tranquilu, y nengún equipu s'echaba al ataque, nun fuera que lu pillaren dempués a la contra. Asina pasó'l primer tiempu, en que nun hubo ocasiones clares hasta que nel 35 Lozano, Pablo y Villa estropiaron la primera pal Sporting, que diba garrando'l control del balón. Na segunda parte, el partíu acabó de romper colos cambios nos dos equipos y, sobremanera, cola actuación del árbitrio. Nel equipu de Xixón, la lesión de Pablo forzó la entrada de Lediakhov, recibíu ente los aplausos de l'afición, que nun entiende por qué la directiva y l'entrenador tienen en dique secu al xugador más caru de la plantilla, mientres que l'Uviéu metió a Geni pa enllazar arriba con un Oli secañosu de balón y que namás tuviere una ocasión énte la puerta de Valencia en tol partíu. Cuando'l partíu entraba nuna fase más d'ataque, Rodado Rodríguez pitó-y la segunda mariella a Juan nun saltu que nun yera como pa andar sacando tarxetes a naide. La espulsión esprecetó al Sporting, que s'echó más p'alantre mientres l'Uviéu paecía que taba n'ayén. Sastre dió-y el pase de la muerte a Soto, que nun perdonó, pero Rodado, cinco minutos dempués de lo de Juan, anulaba'l gol por orsay. L'afición del Sporting bramó tanto qu'hubo que parar el xuegu un par de minutos en medio d'una pitada escandalosa. Quedaben menos de diez minutos pa facer daqué, y nesi tiempu el Sporting comió al Uviéu. Lediakhov, na so meyor xugada, dió-y un bon pase a Borreguero, que falló igual que fadría Villa poco dempués, perdiendo la última ocasión pa los de Pepe Acebal.A la fin , L'últimu derby del añu añu acabó n'empate a ceros, un resultáu que nun-y val a nengún de los dos equipos p'aspirar al ascensu, sobremanera cuando Recreativo de Huelva y Rácing de Santander enancharon un poco más ayeri la resquiebra que los separta de los asturianos nuna llucha pol ascensu a la que tamién quier apuntase l'Albacete.

Contador Estadistiques