Sporting 0 - Getafe 0

El Sporting ta rematando ramplonamente una campaña pa escaecer, y ayeri consiguió que'l públicu d'El Molinón s'engafentare col equipu depués d'un partíu en que nun hubo nada que pagare la pena pagar por velo. Ye por ello que la parroquia del Sporting ta menguando enforma nesti final d'una lliga que parez que nun va acabar nunca pa los de la camiseta a rayes. Suerte tuvieron los de Maceda de que'l Getafe viniere a Xixón col ánimu posáu y nun entrare a disputar el partíu, qu'acabó como entamó, y lo poco de calidá de los asturianos tuvo na defensa, porque l'ataque, que namás asomó de la qu'acababa la primer parte, tampoco nun dexó nada pa la semeya, sacantes un fallu de Segovia, que nun supo rematar a puerta vacia.