Skontra y Zea Mays alcuéntrense en Xixón con toles entraes vendíes

Ixuxú Cultura celebra'l so primer aniversariu nel Tizón con música n'asturianu y eusquera, y prepara dos cites más pa marzu.

La promotora de conciertos en llingües minorizaes ta de celebración y por eso quier compartir col públicu un conciertu de dos de les bandes más representatives del punk y rock asturianu y vascu. Y non de manera casual, yá qu'unos son los qu'Ixuxú Asturies-Euskal Herria Elkartea (2013-2018), el xerme d'Ixuxú Cultura, más llevó a tocara a Euskadi, y los otros, los primeros que fixeron el camín inversu p'actuar nel país allá pel 2013.

Trátase de Zea Mays, grupu "al que se-y queda curtiu la etiqueta de rock", y ye que los vascos, que visiten per tercer vegada en Xixón pa dar aniciu a una xira que los va llevar per festivales d’Estaos Xuníos y México, preséntense "a vegaes pop, otres tastiando’l stoner, tamién xugueteando cola electrónica...". "Inclasificables y, sobre manera, emocionantes en directo", apunta Ixuxú Cultura.

Xunto a ellos, Skontra, veterana banda de la escena musical asturiana que lleven el punk-folk por bandera. La cita va ser mañana nel Tizón dende les 20 hores, con entraes a 12 euros anticipada en llinia, yá escosaes.

Nogel y Dupla

Ixuxú Cultura tien en cartelu dos cites nueves en marzu. El 2 de marzu, a les 21.30 en La Salvaje d’Uviéu, trai a Nøgen, formación moza vasca con influencies como La M.O.D.A o Mumford and Sons que fai indie, folk, pop y rock, pa la presentación del so tercer discu, ‘Åben Cirkel’.

Tamién n'Uviéu, anque nesta ocasión en la Lata de Zinc el 15 de marzu, y con un segundu conciertu en La Traviesa, en L'Infiestu, la xornada siguiente, van repetir actuaciones n'Asturies un añu depués los vascos Dupla. Rap, reggaeton, electrónica, rock, punk y baille pa dos actuaciones que van sirvir pa dar a conocer 'De un pueblo llamado Agurain', el so segundu álbum.