Sigue la xuba del euru

Selmana de xubes nos mercaos internacionales con resultaos mistos nes distintes places bursátiles. La Bolsa de Madrid tuvo una perbona selmana cola novena xuba consecutiva anque con una probetaya variación positiva. L'Ibex-35 algamó la cota sicolóxica de los 8.000 puntos, espeyando'l bon momentu de la renta variable. L'euru tamién tornó a la xuba. Mentanto, el petroleu continua un rally alcista allegándose al so techu.

Les bolses del Vieyu Continente tuvieron una selmana de blincos. El vienres, la Bolsa de Llondres foi la qu'algamó les mayores perdes dempués de qu'un positivu datu de xorrecimientu del PIB británicu d'un 0,9% nun influyere nos inversores. A la contra la bolsa madrilana foi de les que meyor pieslle tuvieron, anque tampoco influyó nello la estadística de precios hoteleros con una medra del 4,1%. Francfort tuvo un pieslle positivu, mentantu que París nun tuvo cambeos bultables. Al otru llau del Atlánticu tamién hebo un pieslle mistu, col Dow Jones cayendo'l 0,52% hasta los 10.568,20 puntos y l'índiz tecnolóxicu Nasdaq xubiendo'l 0,23% hasta los 2.123,87 puntos.


Máximu anual na Bolsa de Madrid, algamando l'Ibex-35 los 8.114,50 puntos, lo que supón una xuba selmanal del 1,7%. El volume de negociu algamó'l vienres los 2.223,11 millones d'euros. Colos inversores apostando pola xuba, naide nun quier vender papel de momentu. Amás, la capacidá de compra de los fondos y l'apueste pola renta variable de los grandes patrimonios tan tirando p'arriba pel mercáu madrilanu. El casu ye que dende la burbuya tecnolóxica d'últimos de 1999 nun se víen tantes xubes siguíes. Unión Fenosa algamó una xuba penriba'l 3,5% siendo la estrella de la selmana. Tamién tuvieron ganancies bultables Sogecable, con más d'un 2% na selmana y una revalorización añal del 18,8%, y, dientro del Grupu Telefónica, la filial de Móviles y la mesma matriz, que ya ta nos 13 euros acción con una xuba añal de cerca del 12%. Nel terrén de les perdes destaquen Repsol YPF, Sacyr Vallehermoso, Iberia y Banco Popular. De toles formes la petrolera Repsol YPF ye una de les empreses del sector con meyor comportamientu. En xeneral el sector bancariu tuvo una mala selmana xunta les cayíes nel sector de la construcción.

L'euru sigue camín de la estratosfera. La selmana pasada la moneda europea tuvo una la xuba más grande nos últimos diez meses, con un pieslle nos 1,262 dólares unidá. Dende'l Bancu Central Européu (BCE) siguen sorrayando los riesgos de volatilidá del mercáu de divises y l'eleváu preciu que de la divisa. Na mesma llinia dio anuncia nel Foru de Davos el ministru francés d'Economía, Francis Mer, del empeoramientu de los resultaos empresariales pola sobrevaloración del euru.

El petroleu sigue penriba los 30 dólares barril. Anque la xuba del preciu d'esta materia prima frenó pola meyora de les reserves de gasolina nos Estaos Xuníos, los mercaos siguen faciendo'l so apueste pol encarecimientu del barril. La selmana pasada'l preciu algamó los 31 dólares barril. Paez que la OPEP ta perdiendo pesu nel control de los precios pola xuba de la producción de países que nun tan dientro d'esti cartel enerxéticu, pero la OPEP ta mirando de mete-y más tisoria a la producción pa la primavera lo que nun diba ayudar a aposentar el preciu del oru prieto. Xunta esto, la producción d'Iraq ta mui perbaxo de los niveles productivos d'enantes de la invasión. Nel mercáu de renta fixo la delda tuvo una perbona selmana trancando con ganancies. El bonu alemán a diez años yá tien una rentabilidá del 4,087%.