Sigue la polémica pola basa d'Avilés

El Colectivu Ecoloxista d'Avilés, que yá se punxere'l mes pasáu en contactu cola Conseyería de Mediu Ambiente pa pidir información sobre'l tratamientu que diba dase-y a la basa contaminao de la ría d'Avilés volvió ayeri a solicita-y información complementario al Conseyeru


L'otru añu, la Conseyeria de Mediu Ambiente informare a los ecoloxistes de que lo que veíen más conveniente yera neutralizar primero los contaminantes por inertización pa guardalos depués nun vertederu herméticu de seguranza.

Según los ecoloxistes, al tenor de la información qu'apurre la Conseyería apaecen bien de duldes sobre'l métodu que va seguise pa neutralizar los contaminantes primero de llevalos al vertederu. Al paecer d'esti grupu,

el vertederu d'Aceralía que va emplegase nun ta
preparáu pa ser un depositu de seguranza pol diseñu que tien, que permitiría que recudiesen los contaminantes que se posaren nelli, colo que volveríen a la ría dempués de gastar cientos de millones en retiralos.

N'otru orde de coses, pal colectivu avilesín ye evidente que lo que se quier ye dar facilidaes pa construyir na redolada de la ría en tiempu d'elecciones, pero ensin facese como debiere'l llabor de retirada. Nesti sentíu hai que remembrar que la retirada de la basa del tramu de dos kilómetros de la ría enxértase nuna operación urbanística muncho mayor na que va espropiase cerca de 700.000 metros cuadraos de suelu pa construyir unes 4.800 viviendes y enterrar les víes del tren que pasen al llau de la ría.

El colectivu denuncia que la basa acumulao n'Avilés tien tases mui grandes de plomu, zinc, cadmiu, y PCB, el peligrosu aceite que s'usaba enantes nos tresformadores de la corriente y que ta perdemostrao que ye un potente carcinóxenu.

El colectivu Ecoloxista diz que nun diba ser la primer vez que se fadríen les coses apriesa y corriendo, y ponen el casu del polígonu industrial del PEPA, asitiáu en tarrén de l'antigua Ensidesa y onde tres el llabor de llimpieza apaecieron 20.000 tonelaes de suelu contamináu, que-yos abulta poco pa lo que tenía que ser. El Colectivu remata diciendo que la basa lleva ellí más de venti años, y que nun hai razón p'agora facer les coses mal por culpa del apurón.