Siete restoranes asturianos na Guía Michelin

La gastronomía asturiana saca nota na última actualización de la prestixosa Guía Michelín. L'estoyu mundial de restoranes que tolos años encamienta la casa de cubiertes pa coches ta acabante d'enxertar trés restoranes asturianos más a los cuatro que yá esistíen. L´Alezna en Caces, Paladares y La Solana en Xixón, son los trés llugares qu'entren a representar, con una estrella de puntuación caún a la cocina del país xunta los otros cuatro que yá puntuaben, que yeren Casa Marcial y El Corral del Indiano nes Arriondes, Casa Gerardo en Prendes (conceyu Carreño) y la Taberna Viavélez. Con esta representación, Asturies ye la tercer comunidá del estáu con más restoranes na Guía Michelín tres de Cataluña y Euskadi, ello aparte del reconocimientu que supón pal llabor de dellos de los restauradores más nuevos de la cocina asturiana, como son Pedro Martino, Alejandro Urrutia o Gonzalo Pañeda.