“Si l’Ayuntamientu nun acepta esto yo nun lo entiendo”

Boni Ortiz, representante de la plataforma "Cultura pal Arango" defende que'l plan de viabilidá ellaboráu pola consultoría de Roberto Berciano ye una oportunidá de negociu pa toos

Raspiando'l tope de tiempu de dos meses que punxere l'Ayuntamientu de Xixón, la plataforma "Cultura pal Arango" que defende la recuperación del históricu coliséu de Xixón pa usos culturales, presentó esti llunes el Plan de Viabilidá qu'encargare a la consultoría de Roberto Berciano. El preste del Conceyu de Xixón al plan del colectivu ciudadanu ye la última posibilidá pa torgar el plan de Corporación Dermoestética, que quier poner una clínica nel teatru.

Boni Ortiz, representante de la plataforma, esplicó a Asturies.com que los conteníos del plan entovía nun son públicos en cuantes que l'alcaldía y grupos con representación nel Conceyu pidieron un plazu de dellos díes pa poder estudiar la propuesta de la plataforma, pero tamién adelantó que, al paecer de la plataforma, el plan que se presentó ye una bona oportunidá pa que toles partes implicaes salgan ganando, polo que l'autor teatral nun entendería que l'Ayuntamientu refugare la propuesta.

Ortiz sorraya'l fechu de que'l plan enxerta la "interesante" propuesta de francer l'edificiu en dos plantes, la d'abaxo, con 800 metros cuadraos y la bóveda a 18 metros d'altura, abondo pa tener una acústica decente, quedaría pa usu del teatru, mientres que la d'arriba, con cerca de 1.000 metros cuadraos, quedaría pa usos comerciales. Boni Ortiz nun escuende que-yos prestaría más da-yos un usu comercial de tipu "alternativu" a esa segunda planta, pero acepta a Corporación Dermoestética como compañeru de viaxe y sorraya que "la nuestra propuesta ye mui interesante porque supón crear 1.000 metros cuadraos de superficie nel centru de la ciudá, cosa difícil de consiguir" . En cuantes al coste y viabilidá económica del proyectu, el representante de la plataforma quixo más esperar a que se faiga una presentación pública del plan, pero tamién adelantó nesti sentíu que los costes son "asemeyaos a los del Teatru Filarmónica, que ta sacando alantre l'Ayuntamientu d'Uviéu".