"Si Cherines llegó al llímite del absurdu, Gázquez superólu", llamenta Iniciativa

|
Paloma Gázquez

El coleutivu asegura qu'axuntar l'alderique de la oficialidá colos derechos del profesoráu, como fixo la popular, "resulta miserable y falso".

La posición que caltuvo Paloma Gázquez ayeri nel afitamientu de posiciones nel debate sobre la Proposición Non de Llei pa encamentar al Gobiernu a la creación de la especialidá docente de Llingua Asturiana y Gallego-asturiano sorprendió a Iniciativa pol Asturianu, que tien aconceyao en delles ocasiones cola candidata del PP por Asturies pa tratar esti asuntu "alcontrando siempres el sofitu a esta reclamación". "Nun entendemos agora la negativa repentina a iguar esa desigualdá hestórica. Si Mercedes Fernández llogró llegar al llímite del absurdu col asturianu, Gázquez consiguió superalu ayeri na Cámara Baxa pa llegar a un nivel cutre, llamentable y de chigre", llamenten.

"L’aprobación de la especialidá docente yá foi un compromisu del PP nel añu 2012, qu’hasta UPyD apoyó en dalguna votación na Xunta Xeneral", recuerda la organización, que considera que "axuntar el debate de la oficialidá con una midida que va ameyorar les condiciones llaborales de los y les docentes, como fizo Gázquez nel Congresu, resulta miserable y falso". Por contra, Iniciativa pol Asturianu quier treslladar "al restu de grupos parllamentarios y representantes, de manera especial, a Sofía Castañón por presentar la iniciativa y a Roberto García Morís por sofitala, l’agradecimientu pol trabayu pa sacar alantre esta Proposición Non de Llei", aprobada con 19 votos a favor y 15 en contra.

Na semeya, Gázquez l'añu pasáu nuna sesión de la Comisión de Transición Ecolóxica y el Retu Demográficu nel Congresu.

Contador Estadistiques