Shakespeare n'asturianu

El Teatru Palacio Valdés d'Avilés acueye a les ocho y cuarto d'esta tarde, dientro del ciclu teatral "Fecho n'Asturies" la estrena absoluta de la obra "El Rei Ricardo'l Terceru" montaxe del grupu "Bacanal Teatro" sobre la versión n'asturianu que fizo l'escritor Milio Cueto de la obra de William Shakespeare. Ye la primer vegada que va representase al autor isabelín n'asturianu, y amás la representación va facese nun escenariu asturianu dafechu. Ello ye que la intriga palaciega de la obra treslládase nesta versión a un decoráu siderúrxicu col tresfondu de la fábrica d'Ensidesa.

Milio Rodríguez Cueto fizo esta versión n'Asturianu va cásique diez años. El traductor sorraya de la obra que "nel 1593 Inglaterra vivía un momentu de patriotismu unitarista depués del trunfu sobre l'armada invencible nel 1588" ello llevó según el traductor y mayestru de lliteratura nel IES "Doña Jimena" de Xixón a facer una lliteratura y un teatru que s'encontaben nos momentos de xunidá y trunfu de la patria británica, y nesti ciclu ideolóxicu enxertaríase la obra sobre Ricardo'l Terceru, prototipu de malu "qu'escede sobremanera la midida d'otros villanos de la ficción europea y algama una particular y nefasta grandeza, convirtiéndose nun superhome de la iniquidá"