Serie de presentaciones

Esta selmana podemos ver dos presentaciones; la banda de gaites "La Raitana" presenta'l so discu, y "L'Aguañaz" sigue cola serie de presentaciones del so Anuariu de la música.

Esti vienres día 20 a les 20:00 hores, Xune Elipe Raposo, xerente de la discográfica "L'Aguañaz", presentará l'anuariu de la música asturiana en Candás. Esta presentación va ser nel Chigre "La Gueta" de Candás, sede del "Conceyu Cultural la Gueta", asociación qu'entama la presentación. Esta entidá desenvuelve'l so trabayu nel conceyu de Carreño, col principal envís d'esparder la cultura asturiana; pa ello entama charres, presentaciones de llibros, excursiones, talleres...etc. Pa ponevos en contacto con ellos namás tenéis que pasar pel chigre "La Gueta" pa que vos informen de les sos actividaes.

Per otru llau, la banda de gaites "La Raitana" presenten el so discu'l sábadu 21 a les 21:00 hores, el llugar va ser la "Sala de Cámara" del auditoriu Príncipe Felipe d'Uviéu. Ellí presentarán "De la Revuelta a la Marea", discu d'esta banda de los conceyos de Nava y Piloña, del que falaremos con más detalle d'equí a poco.