Selmana positiva nes bolses

Bona selmana nos mercaos internacionales dempués de delles selmanes d´inestabilidá. La última selmana d´Ochobre dio-yos munches alegríes a los inversores gracies a les xubes xeneralizaes nes principales places. El peligrosu mes d´Ochobre nun foi tan malu como dalgunes temíen anque´l mieu de munchos nun dexó que los índices tiraren p´arriba con fuercia. El mes foi bien feble pero recuperó terrén nesta selmana hasta trancar en positivo.




La selmana tuvo llena d´estadístiques y datos macroeconómicos. Nel Vieyu Continente destacaron los datos de la Unión Europea: cayida de 8 puntos de la confianza industrial na UE, de 0,18 puntos del clima de negociu, de 17 puntos de la confianza de los consumidores y 95,6 puntos de confianza económica. Ablayante, pero dientro de les previsiones. Sicasí'l datu más señeru de la UE ye´l 2,1% de previsión d´IPC, una décima penriba les espectatives de los economistes. Mal datu de ventes minoristes n´Alemaña, que quedó a pre cuando s´esperaba una medra. Nun foi tampocu bon datu la medra del desempléu en Francia al quedar en 9,7%. Nel Estáu Español, importante xuba de les ventes minoristes que foi del 6,6% más. Al otru lláu del Atlánticu, el datu de confianza de la Universidá de Michigan foi de 89,6 puntos, dientro de les previsiones. Tamién nos Estaos Xuníos, el datu de los xerentes de compres foi de 55 puntos mentantu que la rellación renta / gastu personal dio un resultáu 0,3% según lo qu'esperaben los analistes. Pero'l datu de la selmana foi l'históricu datu del PIB de los Estaos Xuníos, con una medra del 7,2%. Parez ser que la locomotora americana entama a furrular.

Les bolses europees tuvieron una bona selmana. De fechu, el vienres les principales places del continente européu trancaron con importantes xubes menos Londres y París que tuvieron unos pieslles mui febles. Selmana aposentada en Wall Street, que trancó en positivo. L´índiz Dow Jones trancó'l vienres nos 9.801,12 puntos, con una xuba del 0,15%. A la contra l´índiz tecnolóxicu Nasdaq tuvo una perda del 0,02% hasta los 1.932,21 puntos. Les empreses con más ganancia foron Sun Microsystems, American Power, Cigna y Power One.

El pieslle del Ibex-35 el vienres foi perbonu, con una xuba nel conxuntu la selmana del 3,8% pa mangase nos 7.129 puntos. Gracies a estes xubes pudo salvase'l mes d´ochobre na Bolsa de Madrid. Nel conxuntu del mes la medra foi d´un probetayu 0,15%, anque tolos díes de la selmana pesllaron en positivo. Ensin dulda la noticia de la selmana foi la salida a bolsa d'Antena 3 TV con un ésitu bultable. Nel primer día de cotización la cadena xubió hasta los 27 euros acción. Tamién foi noticia, esta vegada non mui bona, del pasu del valor Tafisa al mercáu continuu. Esta empresa dempués d´un mes de setiembre en xuba, terminó la selmana con una perda penriba´l 50%. El vienres trancaron en positivo Mapfre, BBVA, SCH, Iberia y Avanzit. Nel terrén de les perdes amás de Tafisa baxaron Antena 3 Televisión y Gamesa.

L´euru mangóse nos 1,1620 dólares nuna selmana de munchos blincos nel mercáu de divises. La moneda xaponesa tamién dexó a más d´un ablucáu al llegar a los 110 dólares yen. Bona selmana pa la renta fixo, destacando'l bonu español al medrar esgaya la so rentabilidá a diez años. La rentabilidá del bonu español a diez años ya ye del 4,317. Nel mercáu de materies primes, el petróleu sigue nos 27 dólares barril dempués d´una corrección a 29. Otramiente, la cotización del oru xubió hasta los 387 dólares onza.