Selmana de ganancies y xuba del euru

La fuercia inversora tiró peles bolses, sobremanera nos parqués europeos. Anque les estadístiques macroeconómiques del otru llau del Atlánticu nun foron mui bones, la comunidá inversora quier rematar l'añu ente xubes. Tamién foron anuncia les históriques xubes del euru. Na Bolsa madrilana algamóse un nuevu máximu del añu sofitáu poles grandes empreses del selectivu Ibex 35. Asina la selmana pasada foi perbona pa les empreses del sector cíclicu y les aseguradores nos parqués del Vieyu Continente, que pesllaron toos en positivo.

Al otru llau del atlánticu destaquen los probetayos resultaos de la economía d´Estaos Xuníos, con datos como la cayida de tres décimes de los precios de producción cuando contaben que medrase una décima, saldu negativu de 41.800 millones de dólares na balanza comercial y baxada del índiz de confianza de la Universidá de Michigan. Asina, en Wall Street los resultaos nun pintaron tan bien, con una selmana de blincos que dexo al Dow Jones nos 10.042,16 puntos con una probetaya xuba del 0,34% mentanto que´l índiz tecnolóxicu Nasdaq tuvo una medra asemeyada hasta los 1.949 puntos.

N'España, tercer selmana de xubes nel Ibex-35 con una medra nel conxuntu de la selmana del 1%. El vienres el selectivu asitióse nos 7.434 puntos con una xuba del 0,03%. Asina, la Bolsa de Madrid ta mangada otra vegada más en máximos nun rally de xubes de fin d´añu. Lo más destacao foi'l volume de negociu, penriba los 2.100 millones d´euros. Ente los valores más nomaos a na selmana tuvieron el castigáu Inditex y Gamesa, beneficiada por un alcuerdu estratéxicu, mientres que la testil gallega dio anuncia d´unos resultaos que nun-yos prestaron a los inversores. El Grupu Telefónica sigue meyorando resultaos cola matriz y la filial de Móviles como cabezaleres del entramáu empresarial. Ún de los fechos de la selmana foi l'abandonu de Dragados del Ibex pola fusión cola constructora de Florentino Pérez, ACS. Otra selmana más de chicharros, esta vegada con perimportantes xubes de Montañas Quijano y la ya mítica Urbas. L´índiz xeneral de la Bolsa de Madrid mangóse nos 783,65 puntos.

L´euru algamó un nuevu máximu históricu esta selmana al cotizar a 1,2280 dólares. El casu ye que´l dólar yá lleva cinco selmanes a la baxa. Pero nun ye solo l´euru'l que gana a la moneda norteamericana, en cuantes que´l yen y la llibra tamién tan arrampuñando-y terrén a la primer moneda del mundu. El retrasu de la recuperanza económica nos Estaos Xuníos ye una de les razones de la feble cotización del dólar anque tamién apunten dellos economistes al abandonu de l´alministración Bush a la política de moneda fuerte.

Según dellos analistes esti va ser l'últimu añu na que'l mercáu de la renta fixo va tar penriba de la renta variable. De fechu, el mercáu yá tien en cuenta que nel 2004 el BCE va xubir los tipos d´interés. La rentabilidá de los bonos a diez años ta perdiendo interés anque entovía ta penriba´l 4%. Otramiente, la xuba del preciu del petroleu sigue énte la situación n'Iraq, les reserves enerxétiques probetayes nos Estaos Xuníos y la inestabilidá política en dellos países como Venezuela y Nixeria. Amás, na última xunta de la OPEP alcordóse caltener una política de precios altos. Nel casu europeu la xuba del preciu d'esta materia prima ta frenándose gracies a que los barriles páguense en dólares, divisa que cotiza perbaxo l'euru. La selmana pasada punxo'l barril Brent en 29,75 dólares, una xuba selmanal del 3,5%. Tamién esti añu ta siendo mui positivu pa la cotización del metal amariello, l´oru, que yá val 407 dólares la onza.