Selmana a la baxa na bolsa

Selmana de más a menos nos mercaos bursátiles. A lo último, la comunidá inversora entamó a facer caxa dempués de delles selmanes de xuba, anque influyó sobremanera nello los malos datos de los Estaos Xuníos, ello aparte de que los últimos máximos en dellos índices bursátiles dieron-y vértigu a más d'un broker. L'Ibex asitióse perbaxo los 8.300 dempués d'algamar más d'un máximu anual. Asina les bolses pesllaron a la baxa pola fuerte toma de beneficios.

L'IPC d'Estaos xuníos foi'l datu más floxu de la selmana pasada, marcando un repunte inflacionista que tiró con fuercia p'abaxo de los mercaos norteamericanos y europeos. La selmana terminó con cayíes importantes nos principales parqués. Wall Street tuvo un pieslle en negativo y l'índiz Dow Jones terminó nos 10.619,03 puntos (-0,43%) col tecnolóxicu Nasdaq aguantando los 2.037,93 puntos (-0,39%). Les mayores cayíes foron pal sector tecnolóxicu y farmacéuticu, rescamplando la cayida de Hewlett-Packard. Nel Vieyu Continente les coses nun se dieron meyor. La Bolsa de Francfort foi la más afectada con una cayida del 1,6%.

El vienres pasáu l'Ibex-35 sufrió la segunda perda más grande d'esti añu (-1,23%) hasta asitiase nos 8.237,80 puntos. Xunta los malos datos macroeconómicos d'Estaos Xuníos pesó sobremanera na bolsa madrilana l'escalabru del índiz bursátil brasileñu, el Bovespa. Un escándalu financieru que chisca al gobiernu de Lula da Silva fundió'l mercáu más rentable d'esti añu en Latinoamérica. Mala selmana con ello pal Grupu Telefónica, onde la filial de Móviles tuvo una cayida de más del 4%. Tamién se ruxe la posibilidá de venta de la filial de TPI de Telefónica. La matriz tamién tuvo perdes penriba'l 2%. Los blue chips de la Bolsa de Madrid tiraron p'abaxu pel mercáu siendo los Endesa, BBVA, SCH. Prisa, Iberia y ACS los que más perdes tuvieron. A la contra, Repsol YPF foi una de les estrelles de la selmana gracies a l'anuncia de planes d'espardimientu nel sector del gas. Nel llau de les ganancies tamién tuvieron Altadis, Gamesa, Inditex y Arcelor.

La debilidá del dólar asitia a a la moneda europea nel cambéu de 1,25 dólares. La selmana pasada los mercaos de divises vieron los blincos que daba'l yen con una cayida del 1,6% hasta los 108,8 unidaes por dólar énte una sicosis terrorista nel Xapón. Nel mercáu de materies el petroleu caltiénse sobre los 30 dólares barril (30,65) anque aseló la so xuba pola anuncia d'una recuperanza nes menguaes reserves enerxétiques d'Estaos Xuníos. Tamién tuvieron una selmana a la baxa los bonos a diez años dientro del mercáu de renta fixo. El bonu de referencia n'Europa, l'alemán, terminó cotizando nuna rentabilidá del 4,125%.