Seis bienes benefíciense d'actuaciones de restauración

|
Berta Piñán ilesia de Santa Maria de Lluiña

Allúgense nos conceyos de Cuideiru, Villaviciosa, Uviéu, Llaviana y Ayer.

El Gobiernu tien en marcha inversiones por valor de 1.078.039 euros pa restaurar media docena de Bienes d'Interés Cultural (BIC). De los proyeutos ún yá finó, la recuperación de la torre de Soto, en collaboración col Conceyu d'Ayer, a lo que se destinó 273.733 euros.

Mentes, ta cerca de completase la de Puente d’Arcu, en Llaviana, con un presupuestu de 375.218 euros, que tien l'oxetivu de recuperar los valores culturales de la pasarela medieval y desaniciar elementos distorsionantes o parasitarios. Completen esti programa puestu en marcha dende la Conseyería de Cultura, Política Llingüística y Turismu la restauración de la cubierta del templu de San Salvador de Valdediós, en Villaviciosa, por 222.669 euros; l'actuación na ilesia de Santa María de Bendones, n'Uviéu, pa combatir los problemas causaos poles filtraciones y la falta de mantenimientu afayadizu, a la que se dediquen 144.152 euros; los ensayos téunicos na ilesia de Santuyano, tamién n'Uviéu, pa la compatibilidá colos morteros orixinales de cara a un futura capa del templu que protexa les muries y les pintures interiores, afeutes pola humedá, con una inversión de 43.064 euros; y los trabayos na ilesia de Santa María de Lluiña, en Cuideiru.

A visitar les obres del templu pixuetu foi la conseyera Berta Piñán esta mañana. Éstes, na so primer fase, buscaben finar coles graves humedaes del capital de la torre, pa lo que se dediquen 92.936 euros.

Nel avance de los trabayos descubrióse que les escultures ornamentales presentaben quiebres y meteorizaciones que facíen necesaria la intervención d'un especialista pa la so conservación y caltenimientu. Ta previsto que l'actuación completa en Soutu Lluiña fine a lo primero d'avientu.

Na semeya, Piñán –tercera pela derecha–; el direutor xeneral de Cultura y Patrimoniu, Pablo León –segundu pela derecha–; l'alcalde de Cuideiru, Carlos Valle –cuartu pela derecha–; y l'equipu téunicu que trabaya na restauración de Santa María de Lluiña.

Contador Estadistiques