Selmana de les Lletres Asturianes

Segunda xornada con menos de 100 casos nuevos de COVID-19

|
Vacuna Moderna

La tasa de positividá diaria asitióse nel 4,46 por cientu. Hebo que llamentar una muerte.

A falta de la espublización de los datos oficiales de la COVID-19, la Conseyería de Salú comunicó la detección de 83 casos nuevos ayeri –l'actualización rebáxalos a 81 por duplicaos de díes anteriores–. Ye ún menos que'l domingu, cuando se rexistraron 84, y permite acumular dos xornaes con una cifra menor de 100 contaxos.

El Serviciu de Salú del Principáu d'Asturies (SESPA) fixo 3.162 pruebes de diagnósticu d'infeición activa, polo que la tasa de positividá diaria quedó nel 4,46 por cientu, inferior a la de la xornada previa, cuando s'asitió nel 5,32 por cientu con 2.010 tests. L'actualización última asitiaba esti porcentaxe a 7 díes nun 5,54 por cientu –ayeri baxó al 5,4 por cientu–.

Finó cola enfermedá causada pol coronavirus SARS-CoV-2 un home de 77 años. Ye la muerte númberu 1.945 dende qu'entamó l'andanciu.

Hai hospitalizaos 164 pacientes con confirmación o sospecha de COVID-19, a los qu'hai que sumar 61 que tán na UCI. Son 13 y 2 menos que'l domingu, de manera respeutiva.

Na semeya, caxes con dalgunes de les 5.400 dosis de la vacuna de Moderna llegaes na tarde d'ayeri a Asturies y que se sumaron a les 53.820 de la Comirnaty de Pfizer/BioNTech y 2.200 de Vaxzevria d'Astrazeneca/Oxford qu'aportaron hores enantes.

 

Contador Estadistiques