Santo Grial da a conocer el cartel completu de Derramidea

El festival que vien a cubrir el güecu que dexó Santo Grial en Pravia tres la so escapada a Ourense col Derrame Rock yá tien cartel confirmáu. Dixebra, Galán, Arma X, Def con Dos o Ojos de Brujo son dalgunos de los grupos que van tocar nesti eventu.
 
La primer xornada, el xueves 1 de setiembre, va tar dedicada a la música fecha n’Asturies y Dixebra va ser l’actuación principal. Van compartir escenariu colos avilesinos Westhia, Canibalismo Salvaje y los finalistes del concursu de maquetes. Mentes, el vienres el rap va tener protagonismu cola presencia de Def con Dos, Los Chicos del Maíz, Galán, Arma X y Void. N’otra zona, dedicada a la música electrónica, van tar Wagon Cookin, Richi Risco, Jandro AK47 y The Mirror Boys.
 
El sábadu, 3 de setiembre, la música va tar más enfocada al rock, anque’l grupu principal de la xornada va ser Ojos de Brujo. Los catalanes van compartir escenariu con Uzzhuaïa, Helltrip, Los Izquierdos y UME. No que respeuta a la electrónica, Stacey Pullen, David Mallada, Héctor Llamazares y Hugo Rolán, van ser los protagonistes.
 
Amás de conciertos, Derrameidea va tener, como cuando yera un eventu complementariu del Derrame Rock, charres y esposiciones, ente otres actividaes. La entrada pa los conciertos va ser de baldre, asina como l’acampada pa los tres díes. Como nota negativa, Santo Grial Producciones, entidá asturiana qu’entama esti festival y el Derrame Rock, escaeció otra vuelta la presencia de la llingua asturiana nos cartelos y la web del eventu. Nel casu de la edición del Derrame Rock n’Ourense que va celebrase esti mes, sí utiliza'l gallegu.