Sanidá diz que l'alxudicataria de les fontes d'Uviéu nun ta en regla

La polémica poles responsabilidaes públiques nos casos de legionella n'Uviéu chisca agora a la concesionaria del mantenimientu de les fontes públiques que presiden toles entraes per carretera a la capital d'Asturies y les que se reparten pela ciudá. Según diz l'Axencia de Sanidá Ambiental del Principáu d'Asturies, Aqualia SL, empresa alxudicataria del serviciu de mantenimientu, nun ta dada d'alta nel rexistru oficial d'Establecimientos Biocides, cosa que ye precisa pa facer esti llabor, según manda'l decretu 865/2003.

L'Axencia del Principáu descubrió esti fallu a partir d'una documentación que-y pidió al Ayuntamientu d'Uviéu p'analizar el posible papel de les fontes -agora trancaes- nel espardimientu de la bacteria per Uviéu, onde la presencia de la legionella sigue pesando sobre la xente anque nun se dieron casos nuevos dende la selmana pasada. Na investigación de Sanidá, retrasada pola tardanza en recibir la documentación, que taba pedía dende'l 11 de xunetu, y que por llei tenía de tar a disposición de l'autoridá, viose tamién que faltaben los partes de revisión d'instalaciones, d'operaciones de mantenimientu y los resultaos de los análisis del agua. N'apreciando estos fallos, l'Axencia del Principáu pidió una reunión urxente colos responsables del Ayuntamientu d'Uviéu pa esclariar datos de quien tien que presentar que documentos sobre la desinfección de les fontes y asina poder pesllar l'asuntu