Samuel Sánchez da positivu y nun va salir a competir en La Vuelta

Por GHRP-2, una hormona del crecimientu, nuna prueba fecha'l día 9. El BMC apártalu del equipu hasta que se resuelva'l casu.

Samuel Sánchez, que contaba con competir polos puestos altos de la xeneral nesta edición de La Vuelta, nun va tar el sábadu na salida de Nimes tres dar positivu nun control antidopaxe. A la espera d'un segundu control pa ratificar el resultáu del día 9, el BMC punxo en marcha'l so protocolu nestos casos y apartólu de la disciplina del equipu, siendo sustituyíu na ronda ciclisma pol belga Loïc Vliegen.

Ésti ye'l segundu casu de dopaxe que ximielga'l ciclismu asturianu depués del de Santi Pérez nel 2004, pol que tuvo dos años de sanción pese a declarase siempre inocente. Sánchez ye ún de los meyores corredores de la historia del país y nel so palmarés destaca la medaya d'oru nos Xuegos Olímpicos de Beijing del 2008.

Semeya obra de Jakub Cerveny baxo llicencia CC BY-SA 3.0.