Salú confirma’l plan de vacunación pa les selmanes próximes

|
Ismael Huerta, Rafael Cofiño y Óscar Suárez vacunes

El Serviciu de Salú del Principáu d’Asturies (SESPA) ta citando pa esti xueves a los primeros de los 6.000 trabayadores esenciales de 56 a 65 años pa poner la vacuna d’AstraZeneca. Depués va dase prioridá a la población xeneral d’esi tramu d’edá, mentes que sigue l’alministración a mayores de 80 años con Pfizer y Moderna.

La oportunidá que da la retirada de la llende d’edá en 55 años pa recibir la vacuna d’AstraZeneca lleva a la Conseyería de Salú a centrar l’esfuerciu nes persones que cuenten ente 56 y 65 años. “La edá ye l’elementu fundamental de riesgu”, recordó Rafel Cofiño, direutor xeneral de Salú Pública.

Asina, tres la vacunación de sanitarios, docentes y personal de les fuercies y cuerpos de seguridá, el grupu siguiente en recibir la primer dosis d’AstraZeneca va ser la población xeneral de 56 a 65 años, por grupos d’edá, esto ye, primero los de 65, pa siguir colos de 64 y dir baxando de manera progresiva. La fecha prevista, que va depender de los unvíos que lleguen de vacunes, ta ente lo último del mes o entamos d’abril.

La selmana del 5 d’abril ye cuando principiaría la vacunación, tamién por grupos d’edá, de los ciudadanos ente 70 y 79 años, que van recibir les basaes nel ARN mensaxeru –la de Pfizer o la de Moderna–, pa siguir darréu colos de 66-69. Nestos momentos ta vacunándose a los mayores de 80 años, con un 54 por cientu de la población yá coles dos dosis (53.000 persones), mentes qu’esti porcentaxe ente mayores de 90 llega al 83 por cientu.

Una vegada finalizada la vacunación de los grupos de más riesgu que ta recibiendo la de Pfizer o Moderna, esto ye, de 66 p’arriba, estes vacunes tamién se destinarán al restu de ciudadanos por grupos d'edá coles qu'haya disponibles nesi momentu. A les trés actuales tamién va sumase la de Janssen, que va entamar a llegar en mayu, anque nun s'espera una distribución importante hasta xunu.

Otra manera, a día de güei alministráronse n'Asturies 194.982 vacunes y cerca de 78.000 persones recibieron la pauta completa, lo que representa el 7,6 por cientu de la población.

Na semeya, Ismael Huerta, xefe del Serviciu de Vixilancia Epidemiolóxica; Cofiño; y Óscar Suárez, coordinador de Xestión Asistencial del SESPA.

Contador Estadistiques