Salú afala a participar nun cribáu a persones ensin pauta completa

El llamamientu ye pa ciudadanos de cualesquier edá que tuvieren en dalguna situación de riesgu nos díes últimos. El llunes rexistráronse 20 casos nuevos nuna xornada ensin finaos.

La Conseyería de Salú entama un cribáu nel que llama a participar a persones ensin pauta completa de vacunación col oxetivu de dar con positivos por COVID-19 y frenar l'espardimientu del coronavirus SARS-CoV-2. En concreto va dirixíu a aquellos que tuvieren recién en contautu con persones non convivientes ensin midíes de proteición, de manera especial n'espacios d'interior con mala ventilación y ensin mázcara.

Tamién encamienta a facer una PCR a persones que dean positivu nun test d'antíxenos de farmacia, yá qu'ésta ha de confirmase con esti tipu de prueba. Nos dos casos pueden solicitalo al traviés d'esti formulariu.

Tasa de positividá diaria del 1,88 por cientu

A falta de la confirmación de los datos oficiales de la COVID-19, Salú comunicó la detección ayeri de 20 casos nuevos. Son 4 menos que'l domingu, cuando s'informó de 24, les cifres más baxes rexistraes dende'l 7 de setiembre del añu pasáu, con 16 contaxos anunciaos –una revisión posterior redúxolos a 14–.

Ye menor tamién la tasa de positividá diaria, que s'asitió nel 1,88 por cientu, con 1.808 pruebes de diagnósticu d'infeición activa feches, pol 3,76 por cientu, con 1.277 tests realizaos, de la xornada anterior. Esti porcentaxe a 7 díes yera enantes de l'actualización del 3,22 por cientu –ayeri baxó al 3,11 por cientu–.

Nun hebo que llamentar muertes esti día, polo que la cantidá total de finaos nel andanciu caltiénse en 2.058 –una revisión de datos aumenta esta cifra finalmente a 2.059–. Un total de 61 persones tán ingresaos con confirmación o sospecha de COVID-19, a los qu'hai que sumar otros 20 hospitalizaos na UCI, 1 menos con respeuto al domingu entrambos casos.

L'ociu nocherniegu garra aire

Güei reláxense les restricciones pal ociu nocherniegu. Dende esta xornada estos chigfres van poder abrir hasta les 3 y facer usu del interior de los llocales, dalgo que dende'l 13 de xunetu taba prohibío.

También la venta d'alcohol en comercios y gasolineres de 22 a 6 hores, midíes que d'igual forma dexa de tar vixente por mor del ameyoramientu de les cifres de la pandemia.

Na semeya, cribáu celebráu l'añu pasáu en L'Entregu.