Sánchez Vicente va reunise esti miércoles con representantes de la mocedá asturiano

El candidatu d’Unión Asturianista (URAS-PAS) a la Xunta Xeneral, Xuan Xosé Sánchez Vicente, va aconceyar esti miércoles con representantes de los conseyos de mocedá asturianos. El políticu xixonés tien una axenda cargada d’actividaes.
 
Sánchez Vicente va tomar nota de les demandes de los coleutivos mozos asturianos nuna reunión que va tener llugar esta tarde, a les 18.15 hores, nel Conseyu de la Mocedá del Principáu d’Asturies. D’esta forma, quier conocer de primer mano les preocupaciones de los mozos y moces del país cola intención de buscar soluciones a los sos problemes. Nesti aconceyamientu, el candidatu d’Unión URAS-PAS va tar acompañáu por representantes de Xuventú Asturianista, les mocedaes del PAS.
 
El políticu xixones ta teniendo estos díes una axenda mui cargada que nun va aparar hasta la celebración de les eleiciones. Mañana tien previsto acudir a la presentación de Manuel Ángel Sánchez como candidatu de la formación al Conceyu de Carreñu, mentes que’l vienres va participar nos actos d’aniversariu del Institutu Ríu Piles y na inauguración d’una esposición del artista Manuel Iglesias González na Fundación Alvargonzález, ente otres actividaes. Na mañana del vienres, al meudía, tamién tien confirmada una entrevista nel programa ‘Protagonistas Asturias’ de Punto Radio.
 
Otra manera, Unión URAS-PAS declaró esti miércoles tar a la escontra de les cuotes de xarda de la Xunión Europea “sofitaes polos gobierno socesivos de Madrid”. “Lo que roblaren les fuerces centraliegues, PSOE-IU y PP, pa l’adhesión al Mercáu Común Européu foi el desastre de los sectores tradicionales asturianos –ganadería, pesca…–. Nun pensaren nel futuru d’Asturies y de los asturianos, sinón nel so porgüeyu propiu. Entovía Asturies sufre les consecuencies d’eses decisiones na tasa d’actividá y de paru que conseguieron fundir a esos seutores productivos y tan importantes pal país”, señalen dende la formación asturianista.