Rubiera afala a la Federación a contar n’asturianu nes partíes na presentación d’un pallabreru de bolos

|

La Oficina de Normalización Llingüística presento’l domingu’l ‘Pallabreru de los bolos de Xixón’, obra de Carlos Suari. Nel actu, l’edil Carlos Rubiera afaló a la Federación a contar n’asturianu nes partíes y frenar asina “una perda mui seria”.

“Veo que se ta perdiendo la costume de contar los bolos na llingua del país. Yo aprendí a contalos en Caldones viendo a los paisanos xugar depués de misa, pero agora en partíes importantes se siente ‘faltan tres bolos’. Esto ye una perda mui seria”, afirmó’l conceyal d’Educación, Cultura, Xuventú y Fiestes na so intervención na bolera del Muséu del Pueblu d’Asturies, llugar escoyíu pa la presentación del ‘Pallabreru de los bolos de Xixón’. Darreú, Rubiera pidió a la Federación Asturiana de Bolos que “faiga un esfuerciu” nesi sen pa que l’asturianu y los bolos sían “un  too”. Los elementos que conformen la nuesa cultura tradicional nun van sobrevivir de manera independiente”, afirmó l’edil.

‘El pallabreru de los bolos de Xixón’ trátase del quintu volume d’una serie de guíes monográfiques sobre deportes y términos propios d’ellos na llingua del país qu’edita la Oficina de Normalización Llingüística. Éstes tán destinaes, de manera principal, pa escolinos y deportistes, anque ye bien útil pa tola población, que pue solicitalos nes oficines del Serviciu de Normalización Llingüística xixonés. El primeru foi’l del fútbol, al que siguió’l del ciclismu, la natación, el baloncestu y, agora, el de los bolos, por iniciativa propia de Rubiera. “Interesa bastante incorporar pallabres a deportes masivos, pero nun podía pasanos facer un pallabreru al deporte o xuegu únicu que yá nació n’asturianu”, señaló’l conceyal, que nun duldó en facer unes tiraes de cuatriada y de dexabolu nun actu perguapu que preparó nel Muséu del Pueblu d’Asturies la Oficina de Normalización Llingüística con esplicaciones de Suari, autor del pallabreru y espertu en bolos.

Na so intervención, tres una presentación previa por parte d’Octavio Rodríguez, presidente de la Federación Asturiana de Bolos, y les pallabres de Rubiera, que pidió al investigador avilesín la recoyida de frases típiques de la bolera que pasaren al llinguaxe común como ‘veles venir’ o ‘güei nun toi pa la mano’, esplicó que tien rexistraes n’Asturies 43 modalidaes diferentes de bolos y señaló que, cuando tuvo l’encargu d’ellaborar los testos pal pallabreru, vio la necesidá de reenfocar la idea inicial del SNL pa da-y una “perspeutiva xixonesa”. Asina, esplicó que’l deporte tradicional nel conceyu ye la cuatriada, anque Xixón tamién tien un xuegu propiu, nacíu en Trubia, parroquia de L'Abadía Cenero, como ye’l dexabolu. A ellos hai que sumar otros de fuera trayíos por persones que treslladaron la so vivienda a Xixón pero que nun quixeron perder les sos costumes, como ye’l casu del bolu de Tinéu o bolu celta, la batiente y el bolu llionés, llista na que tamién inclúi al ‘bowling’ o bolu americanu, modalidá ésta conocida pola so presencia nes películes y series estauxunidenses.

Tres esta esplicación, Suari decidió centrase en trés xuegos concretos: el bolu celta, el dexabolu y la cuatriada. Asina, esplicó al públicu presente, la mayoría aficionaos a esti deporte, les carauterístiques de caúna de les modalidaes y la so forma de puntuación, atreviéndose a facer delles tiraes. Pa la cuatriada, l’avilesín cuntó cola collaboración de la Peña Bolística El Piles, qu’entrena y compite na bolera del Muséu del Pueblu d’Asturies. El tamién responsable de los conteníos del programa ‘La bolera’ de la TPA reclamó al final del actu “apostar más por esti deporte”, poniendo l’exemplu de Cantabria, que cuenta con namái 4 modalidaes diferentes, y convertir asina a los bolos nun “deporte modernu”. Tres l’eventu, los presentes pudieron atrevese a prauticar con caún d’estos xuegos.

De ‘acabón’ a ‘zona entemedia’

El pallabreru de los bolos obra de Suari cuenta con 30 páxines que s’abren con unes pallabres de Xosé Nel Riesgo, direutor de la Fundación Municipal de Cultura, Educación y Universidá Popular, y de Desiderio Díaz, presidente anterior de la Federación Asturiana de Bolos, pa finar con un vocabulariu específicu d’esti deporte. Asina, podemos conocer el significáu de pallabres como ‘acabón’ o ‘ciebu’ (“Barrera vertical, d’ente 2 y 5 metros d’altura, según el xuegu. Si un bolu pasa perriba, algámase la puntuación mayor”), ‘encalme’ (“Pieza, davezu de madera, na que se posa la bola nel batiente”), ‘pasada’ (“Bola válida, que nun posa nel castru”) o ‘zona entemedia’ (“Parte de la bolera que va del tiru al castru o al armáu”, entre otres munches.

Amás, l’avilesín esplica nes fueyes d’esti trabayu l’orixe y la evolución de los bolos, la implantación d’esti deporte n’Asturies y en Xixón, les carauterístiques y puntuaciones de la cuatriada y el dexabolu, y los xuegos que vinieron de fuera pero que se prautiquen nel conceyu. 

Contador Estadistiques