Rosa María Mateo, posible directora de la TV autonómica

La periodista Rosa María Mateo podría facese cargu de la dirección de la TV autonómica asturiana. La información, que nun ta confirmada oficialmente, asoleyola esta mañana'l confidencial de periodismu PR Noticias, que diz que'l Principáu ofreció-y el cargu a la veterana periodista nuna cena que se celebró'l 16 d'avientu tres d'un actu oficial nel Teatru Xovellanos n'homenaxe a los 25 años de la Constitución nel que tamién participó'l periodista José Oneto y a la qu'asistieron el Presidente Álvarez Areces, el Director de l'Axencia pal Desarrollu de la Comunicación y Servicios Culturales Jorge Fernández León y l'alcaldesa de Xixón Paz Fernández Felgueroso. Siempres según la información del confidencial PR Noticias, Rosa María Mateo tendría aceptada la ufierta que-y plantegaron esa nueche y entraría a trabayar xunta'l restu del equipu que ta organizando la TV el prósimu llunes día 12. El Confidencial PR remata la información esplicando que la periodista vendría a vivir a un xalé na colonia d'El Rinconín en Xixón.

Rosa María Mateo, una de les presentadores d'informativos más conocíes en tol estáu, tien una carrera en TV de más de trenta años. Anque la imaxe que más se remembra d'ella ye énte les cámares de TVE, canal onde pasó más tiempu, dende va unos años trabayaba pa la particular Antena 3, que la despidió esti mes de payares xunta otros 215 periodistes y trabayadores de la empresa. Tres la polémica pol despidu, a Rosa María Mateo parez que nun dexen de sali-y ufiertes. Aparte d'esta posible entrada na TV autonómica, el nome de la periodista sonó como posible na llista del PSOE por Madrid nes prósimes elecciones xenerales de marzu.

El Principáu espresó la otra selmana la intención de que la TV autonómica tea emitiendo pa en pasando'l veranu y apunto al edificiu de la Universidá Llaboral como sé provisional de la canal de TV. Con too y con ello, la TV autonómica ta pendiente de que la Xunta Xeneral dea de pasu la proclamación del Conseyu de Dirección de la entidá, que'l PP torgó en primer instancia na Xunta Xeneral esti mes de payares. La modificación de la llei del ente autonómicu pa permitir que la Cámara pueda aprebar el conseyu por mayoría cenciella en cuenta de los dos tercios que se precisen agora ye'l pilancu llegal que-y queda por salvar a la canal del Principáu