Rodríguez Monteavaro algama’l sobresaliente cola so tesis n’asturianu

|
Miguel Rodríguez Monteavaro defensa tesis

El poeta, músicu y filólogu, Miguel Rodríguez Monteavaro, lleó y defendió esti llunes, na sala de conseyos del Departamentu de Filoloxía Española de la Universidá d’Uviéu, la so tesis doctoral entitulada ‘Estudiu Dalectográficu y Dialectrométricu na Frontera ente l’Asturianu Central y l’Asturianu Occidental (EDACEO)’. El tribunal calificóla de sobresaliente.

La de Rodríguez Monteavaro ye la décima tesis doctoral presentada na Universidá d’Uviéu mandándose de la llingua asturiana y la segunda d’esti añu 2021. La defensa de la mesma foi tamién nesti idioma, anque hebo espaciu pal emplegu del portugués por parte d’unu de los miembros del tribunal, el profesor De Brissos, de la Universidade de Lisboa, y del propiu aspirante na so interactuación con él.

Per otru llau, la presidenta del tribunal, Inés Fernández Ordoñez, de la UAM, y el vocal Gotzon Aurrekoetxea, de la UPV/EHU, emplegaron el castellán. El secretariu, Xulio Viejo, asina como la vocal Rosabel San Segundo Cachero, dambos de la Universidá d’Uviéu, fixeron les sos intervenciones tamién n’asturianu.

Terminada la esposición, y tres de la deliberación oportuna, el tribunal decidió otorgar la calificación de sobresaliente a la tesis presentada por Rodríguez Monteavaro, quedando a espenses del vicerrectoráu la posible concesión del calificativu cum laude. Con esta tesis, na que s’estudiaron 361 trazos llingüísticos de la frontera ente l’asturianu central y l’occidental na zona de los conceyos de Yernes ya Tameza, Grau y Candamu a un llau de la isoglosa principal y Les Regueres, Uviéu, Santu Adrianu y Llanera del otru, queda amosada una diverxencia ente la separación tradicional qu’incluyía a Trubia (Uviéu) y Villanueva (Santu Adrianu) nel llau oocidental de la isoglosa, pa dexalos agora nel llau del asturianu central.

Al terminar l’actu, el director de la tésis, Ramón d’Andrés, lleó unes palabres d’agradecimientu nes que también emplegó l’eusquera pa dirixise al profesor Aurrekoetxea, y encamentó la pronta publicación d’una tesis que tien un induldable valor pa la meyor conocencia de la llinde ente’l dominiu oocidental y central del idioma.

Na semeya, Rodríguez Monteavaro, a la derecha, nun momentu de la defensa de la so tesis énte'l tribunal.

Contador Estadistiques