Rock americano pa la seronda xixonesa

Dellos grupos americanos y unu catalán van tocar esta seronda
en Xixón dientro d'un ciclu de conciertos entamáu polos responsables del Crossroad Festival. Rock clásico de garaxe y blues americanu ye la propuesta que nos faen.



LTI, la promotora responsable d'entamar el festival xixonés de
rock Cross Road, sigue col so llabor de facer de Xixón un llugar onde la
música en directo nun seya cosa raro. Ello ye que de la mano del
responsable de la promotora, l'hosteleru xixonés Quique Louie, cuatro
grupos van visitar Xixón nos meses d'ochobre y payares. La riestra de
conciertos entama güei mesmo col grupu californianu
"The
Bellrays" que van tocar nel Parque del Piles, un conciertu pal que la entrada val 18 euros
na puerte y 15 euros anticipada. Esta banda ta revolucionando'l soul y el rythm
and blues actuales, la so vocalista, Lisa Kekaula, ta acabante de participar
nel históricu conciertu de reunificación del grupu "MC5", nel
Azkena Rock Festival de Gasteiz.



Pa los siguientes fines de selmana les bandes que van visitar
Xixón van ser, el día 22 d'ochobre
"Kid lightning" (con Tracy
Bonham), el miércoles trés de payares dende Detroit vienen
"The Paybacks", y p'acabar
l'aportación estatal el día 20 de payares col grupu
catalán "Tokyo
Sex Destruction". Dende Asturies.com vamos informar d'estos conciertos
según vayan acercándose, anque de toes maneres les entraes
yá tan a la venta nos locales de Xixón "Louie Louie Café",
Tiendes Tipo y Llibería Paradiso.