Rivales madrilanos pal Uviéu y pal Sporting en dieciseisavos de Copa

|
Sortéu dieciseisavos de Copa 2022-2023

L'Atlético va visitar el Carlos Tartiere Nuevu y el Rayo, El Molinón la primer selmana de xineru.

Dos equipos de Primera División de la ciudá de Madrid van ser los rivales del Uviéu y del Sporting en dieciseisavos de Copa. Los azules van tener enfrente a un rival qu'esta temporada xugó Lliga de Campeones, mentes que los roxiblancos van disputar el pase con un bon rival como ye l'equipu vallecanu.

L'Uviéu, qu'ayeri superó al Granada por 1-0 gracies a un gol de Luengo de cabeza nun córner, recibe ocho temporaes depués a un equipu de la máxima categoría. El sortéu quixo que fora l'Atlético, únicu club que nos años últimos pudo meter la cabeza ente los dos dominadores de la competición, el Madrid y el Barcelona.

Los de Simeone van dir a Uviéu, sicasí, nun añu complicáu, eliminaos yá de la Lliga de Campeones y incapaces de metese en Lliga Europa, y en quinta posición en Lliga, a 13 puntos del líder, el Barcelona. En Copa superaron al Arenteiro, que llegó a adelantase nel marcador, por 1-3, y en primera ronda eliminaron al Almazán por 0-2.

La vuelta de Trejo

El Sporting, pela so parte, tuvo un partíu fácil en Los Pajaritos col Numancia (0-3), rival de Primera RFEF. Dos goles de Milovanovic nos minutos 7 y 9 desnivelaron pronto un partíu que mató Aitor García nel añadíu cuando los d'Abelardo taben con 10 por una absurda espulsión de Djurdjevic por doble mariella al protestar un posible penalti que pue traer consecuencies al serbiu.

El siguiente rival de los xixoneses yá va ser un Primera, el Rayo d'Iraola. El conxuntu de Vallecas va octavu en Lliga, con 22, 2 menos que l'Atlético, anque sufrió pa clasificase en Copa, yá que tuvo que dir a los penaltis al empatar 0-0 col Atlético Saguntino de Segunda RFEF, mentes que na primer eliminatoria superó al Mollerussa por 1-3.

La visita del Rayo va permitir la vuelta d'Óscar Trejo a El Molinón, futbolista arxentín que xugó dos temporaes en Xixón, del 2011 al 2013. Tamién va ser un partíu especial pa Mario Suárez, yá que'l so padre ye sportinguista declaráu y el centrocampista siempre amosó simpatía pa col equipu xixonés.

Na semeya, un momentu del sortéu celebráu esta mañana na Ciudad del Fútbol de Las Rozas.

Contador Estadistiques