Río Narcea va procesar mineral de Groenlandia

La multinacional minera de capital canadiense Río Narcea Gold Mines ta acabante de firmar un alcuerdu cola tamién canadiense Crew Development pa que la planta de procesao de mineral d'oru d'El Valle en cangas de Narcea seya la que procese tamién la producción de la mina d'oru que Crew Development ta acabante d'abrir en Groenlandia.

Según comunicaos oficiales de dambes compañíes, l'alcuerdu consiste en carretar hasta Asturies la producción de la mina de Nalunaq, en Groenlandia, a oxetu de que la planta de procesao asturiana separte'l mineral precioso de la tierra. El volume total de la producción que se-y estima a Nalunaq pal 2.004 ye d'unes 160.000 tonelaes, que llegaríen a Asturies en cuatro cargamentos de 35.000 / 40.000 tonelaes. Según esplicó Crew Development, que nun pue procesar el mineral n'orixe por falta d'una planta propia de procesao, la compañía tuvo mirando de llevar el mineral a otres plantes de que-yos cobraben precios asemeyaos, pero nenguna ufiertaba les condiciones técniques de l'asturiana. La compañía minera congraciose de que'l llabor n'Asturies va permitir que la mina de Groenlandia, na qu'entamó a trabayase a mediaos d'esti añu, entre a dar beneficios primero.